الشاعر : محمد العبدالله ابن حسن ( ولد الخال ) ..

[ذيبة تميم .. !]

قالــوا عنيـزة قلت يا حبنا له . . يــاحبنا لـلـي تسـمّى عنيــــزة
أنا أفتخر به كل ما جا مجاله . . حيثه على نفسي وقلبي عزيزة


بسم الله الرحمن الرحيم


http://banitamim.org/upfiles/RUd69962.jpg


محمد العبدالله ابن حسن
( ولد الخال )






هو محمد العبدالله السليمان ابن حسن ,
من النواصر من تميم ,
ولد في عنيزة عام 1378هـ ،

وبها تعلم ونشأ .. والده هو الشاعر المعروف بـ( الخال )

درس في الثانوية الصناعية بعنيزة ,
ثم في المعهد العالي بالرياض ,
ومنه تخرج عام 1403هـ ,
وتعين في المعهد الثانوي الصناعي بالدمام

ومكث فيه من عام 1404 ـ 1409هـ ,
حيث انتقل إلى الكلية التقنية بالدمام وظل بها حتى عام1419هـ
ثم انتقل إلى المعهد الثانوي الصناعي بعنيزة ولا يزال .

عمل في الصحافة الشعبية متعاونا فترة من الزمن ,
ففي جريدة الجزيرة كان يعد زاوية ( شاعر الأسبوع )
وفيها يقدم تعريفا بشاعر من الشعراء ,
ومعظم من قدمهم في تلك الزاوية
هم من شعراء عنيزة .


كما كان يعد زاوية بعنوان ( بين الماضي والحاضر ) , وزاوية ( لغز الأسبوع )
و(بيت ومعنى) ..

وفي جريدة اليوم كان زاوية حرة , وكان يعد فيها لغز الأسبوع أيضا ،
وله مشاركات كذلك في كل من صحيفة الرياض وصحيفة المدينة وصحيفة البلاد .

شاعر موهوب امتهن الشعر فصار مرتبطا بحياته ارتباطا أساسيا ..
لكنه برع في المحاورة أكثر من النظم ,
ومنذ نشأته أولع بالمحاورة ولعا شديدا ,
حتى إنه في بداياته كان يجتمع مع أصدقائه في مزرعتهم الناشئة آنذاك في الجندلية , ويقمون محاورات شعرية كل أسبوع تقريبا .

وإضافة إلى براعته المشهودة في المحاورة , اشتهر بالحوَرْنيّات ,
والأبيات والمقطوعات الطريفة .

ومعظم حورنياته سارت مسير الأمثال , وأصبحت مادة دسمة لرسائل الجوال .. والغريب أن كثيرا من حورنياته ادعاها آخرون ونسبوها لأنفسهم , مثل قوله :


ياليت عند الخال خمسة ملايين = مع فلتين بوسط حي العليا
وأربع حريم كلبوهن مزايين = أرداهن اللي مثل نجم الثريا

. . . إلخ

فقد نسبها أحد الشعراء لنفسه ونشرها في المختلف ووضع بدل كلمة (الخال) كلمة (عبيد) !

من حورنياته السائرة :


يابلير لا تبزع برايك ورا بوش = واخوفتي واللي وطا بوش ياطاك
الغرب كله ما تبا الحرب والهوش = إلا أنت يالسلتوح مع جاك شيراك!

ومنها :


مسكين يا غاندي بغى يلحق أمه = لولا الولي كان الهنود أحرقوا به
الواجب إن اللي يصالي هالأمه = يلعن جدفهم ما يخاف العقوبه !


ومنها :


ماتت أميرة ويلز ليدي ديانا = من موتها شفت أكثر الناس محزون
يارب في هالناس تجبر عزانا =وإلا ديانا جعلها جنب فرعون !

واشتهر محمد إلى جانب حورنياته بولعه بالألغاز الشعرية والمشاركة في صياغتها وحلها ..

وعندما كان يعد صفحة اللغز في جريدة الجزيرة وجريدة اليوم , كان معظم ما يُنشر فيها من إنشائه ..

ويقال إن له أكثر من ألف لغز .. ولا أستغرب فقد رأيت عنده دفترا فيه كم هائل من الألغاز التي سجلها ..

ومعظم ألغازه لم تسجل ,
لأنه كان يصوغها ويرسلها عبر (الكنوود) أثناء الرحلات ,
ثم جاء الجوال فصار وسيلة سريعة وشاملة لانتشار الألغاز ..

ومحمد متابع جيد للأحداث السياسية التي تجري في العالم , وسجل معظم الأحداث المهمة إما بقصائد أو بأبيات ,

حتى إنه يمكن القول إنه لم يمر حدث له تأثير إلا وكتب فيه شيئا ..
ومن هنا تولدت لديه هواية طريفة ,
وهي التوثيق التاريخي شعرا ,

كقوله في تأريخ وفاة الشيخ محمد الصالح العثيمين رحمه الله :


قالوا توفى قلت من قالوا الشيخ = مـحمــد باـن صــالـح ابـن عثــيمــين
يوم الربوع الساعة أربع بتاريخ = خمسة عشر شوال واحد وعشرين

وهو بهذا الاتجاه متأثر بالشاعر الكبير علي القري رحمه الله ,
فقد كان كثيرا ما يؤرخ للأحداث شعرا ..



يتبع ...

[الضبيب سدير]

ماتت أميرة ويلز ليدي ديانا
من موتها شفت أكثر الناس محزون
يارب في هالناس تجبر عزانا
وإلا ديانا جعلها جنب فرعون !

اعجبتني هالقصيده
ونعم والله به وبك

[ذيبة تميم .. !]

يقول الخال :هذه الابيات تعقيباً لما كتبه الاخ/حمد الشطي في الجزيره الشعبيه يوم الجمعه الموافق3/6/1416هـ في قضية الاسبوع بعنوان "كثرة الدواوين والمحتوى الفارغ" ولقد تم نشرها في الجريده



بالمكتبه ياكثر شوف الدواوين=واثنين بالميه ترا ينعناله
الشعر صار اليوم من غير تثمين=كلٍ يجر الصوت فيما طراله
من يوم طاحو فيه ناس غشيمين=ياليتهم طاحوا بشيٍ بداله
من قال له بيت او تفكر ببيتين=قال الكتاب امولمٍ راس ماله
ياليت لك يالشعر شرع وقوانين=من شان في مجراه تمشي العداله
والحكم يظهر في جميع الموازين=كلٍ يبي ياخذ جزاه ابمقاله
أقولها تنبيه والحق تبين=ماني شريطي طامعٍ بالدلاله
لا شك مما شفت ويشاف هالحين=غديرنا ماينشرب من حثاله
اقول ماقالوا رجالٍ قديمين= كلامهم يذكر الا جاء مجاله
الزين ماودك يخلى مع الشين=ودك تخلي كل شيٍ الحاله


يتبع ...

[ذيبة تميم .. !]

في يوم الاثنين الموافق 1/2/1425هجري اغتالت اسرائيل الشيخ ياسين فقال ابوعبدالله :



الى متى نصبـر ونقعـد ذليليـن=ونسكت على شـارون ومؤمراتـه
اتلاهن اللي صار للشيـخ ياسيـن=في ذبحته يوم انتهى مـن صلاتـه
صلى صلاه الفجر في يوم الاثنيـن=اخـر صـلاة تمهـا فـي حياتـه
مقعد وعمره واحد اثنين وسبعيـن=والشوف مامن شوف وده وهاتـه
فجـر بكرسيـه وخلـوه نصفيـن=واعيني اللي يوم شافـت عباتـه
تبكي عليه اعيون غيري ملاييـن=شيخ على نهج الصحابـه سماتـه
مرحوم ياللـي مـات فـي1 / 2=وال 25 هـجــري وفــاتــه
عسى مقـره جنـة الخلـد اميـن=يارب تمحـا كـل ابـو سيئاتـه
شيخ خبر موته يزلـزل فلسطيـن=والعالم اجمع زلزلـه فـي مماتـه
رغم اختلاف الاصل والعرق والدين=كلٍ شجـب هالفعـل وملاباساتـه
الا امريكـا حطتـه بيـن قوسيـن=شارون ماندري قبل عـن سواتـه
تبي تمشيهـا ولكـن علـى ميـن=الكلب لو ماشيف تعـرف صفاتـه
اقطع يميني كان ماهموب داريـن=باللي نوى شـارون بمخطاطاتـه


يتبع ...

[ذيبة تميم .. !]

هلابك يانظر عيني هلابك .. من قديم الشاعر




هلا بك يانظر عيني هلا بك= بعد طولت عني في غيابك
تحملت العنا من شان عينك=عسى ربي يخلي لك شبابك
تعبت ايام لجلك ياحياتي=ومع هذا ولاحي درابك
حلاة الحب في كتمان سره=حشالله مارضى في عتابك
بعد ماوحيت مابي جيت مسرع=صحيح ان الهوى والحب جابك
الاصار اتعذيبك لي يجيبك=اقول اهلا وسهلا في عذابك
غلاك اكبر من الدنيا ومابه=هلابك يانظر عيني هلا بك

يتبع ...

[ذيبة تميم .. !]

وهذي قصيدة أرسلها الشاعر سعود عبدالرحمن اليوسف للشاعر محمد بن حسن



يابن حسن قطع المعرفه صعيبه=قطعتها يابن حسن قطع مسمار
وش جاك مني من علوم غريبه=هات المبرر يامحمد والاعذار
وان كان ماعندك مبرر مصيبه=تبي تسجل لك خطيه وتذكار
والحر مثلك ياالتميمي تعيبه=الى بقت له في سجلات الاشعار
وانا مادور من وراكم كسيبه=الا المعرفه بالرجاجيل الأخيار
ان وسّع الخاطر ونطفي لهيبه=بالرد والا بالسوالف والاخبار
هذي المطامع لا تبعّد قريبه=بالك تروح يمين عنها ولا يسار
وإن كان مالك شف ماهي غصيبه=الربع واجد في بلادين ومصار
أركض وانا مالي طليب وذهيبه=ركضة فسق من جنس ركاب جذمار
وان كان هو صايبك شكٍ وريبه =هذا هو المنهاج مافوقه غبار
وتمت وهو كلٍّ حلاله بجيبه=ماناقص منا ولا ربع دينار
ومني سلامٍ فايح ريح طيبه=عليك ما هلت هماليل الامطار

ورد الشاعر محمد بن حسن على الشاعر سعود اليوسف بهذه الأبيات



حي الجواب وحي منهو يجيبه= ترحيبة من كبرها كبر سنجار
من صاحب توه يدور صحيبه=الله لا يكشف خفيات الاسرار
ينشد عن اسباب الجفا والمغيبه=بيني وبينه تقل يجهل بما صار
هو ناس يومه يطرش نديبه=يمي بهرج شب في مهجتي نار
ياسعود دورات الليالي عجيبه=ذولي مواريد و ذوليك صدار
الحق يبقى مايجي بالنهيبه=معروف يابن الناس في كل الاقطار
ان عودت ياسعود مابه هزيبه=انت الذي تهدم وبيديك الاعمار
واللي تسبب جعل ربي حسيبه=هذا ولك عندي معزه ومقدار
اغليك من قلب تعرفون طيبه=ماينقل البغضا بعمسات الافكار
ياسعود ماعمري دفعت الضريبه=ان قلت او ماقلت لي يابن الاخيار
مرفوع راسي والجدي نقدي به=من خلقتي مانيب خاين وبوار
هذا الذي ودي عليك احكي به=وارجو السموحه منك ياطيب الكار


يتبع ...

[ذيبة تميم .. !]

كل الذي سويت يمك ولا شي=اللي بذلته يا حياتي لعينك
مابيك تطلب مطلب لك وأنا حي=من واحد غيري وأنا في يمينك
وإلى عطاك بغفلتي واحد عي=قل له حشا وش عاد بيني وبينك
خلك معي واكْوَن على خافقي كي=ولا أسمع إنك قلت للغير وينك
حيثك على زهرة هوى مهجتي ضي=ماها غلاك وشمسها نور زينك
لو التمني والمنى فاد في شي=مناي ما تطلق يديني يدينك


يتبع ...

[ذيبة تميم .. !]

× حورنيات مختارة ×


إن قيل مين أحسن قبيلة .. قلنا تميم=ما بالقبايل مثل شكله .. يالآدمي
وإن قالوا احلف ! قلت بسم الله العظيم=في شاعر المليون من غير الشبرمي ؟
هذا ولد عمي كريمِ .. تِرثَةْ كريم=ما له سِمي مهما تدوّر .. ما له سمي


× - - - - - - - ×


وهذه أبيات طريفة قالها تعليقا على إعتزال اللاعب الدولي سامي الجابر
وقالها من باب الممازحة , وإلا فأبو عبدالله بعيد عن مجال الكرة والرياضة



يا سامي الجابر لويش اعتزالك=الناس من مبطي وهم عازلينك
الله يحفظك لأجل ترعى عيالك=وإلا الملاعب وينها وأنت وينك
ما هوب هذا ياسويمي مجالك=لكن على دنياك ربي يعينك !


× - - - - - - - ×



لا شفت ناسٍ يشربون المراعي=واللي مثيله قلت يحّول يحّول
ما عندهم مثلي طليق الذراعي=يجلب لبن (عيران) يمي بلا قول
إن قلت شكرا قال ما فيه داعي=وإن قلت حقه قال ماهوب مقبول
الله يحقق له جميع المساعي=ويوفقه فيما يريده على طول

ولبن (عيران) لبن معروف في الكويت .. يستاهلون هالدعاية المجانية !


× - - - - - - - ×



اطلع من الساعة موجّه على الشرق=وابتل لما تاصل لأول إشاره
ناظر يسارك وأنت تدري وش الفرق=مدري متى تقضي هذيك العماره !


× - - - - - - - ×



راح العراق وراح قبله فلسطين= الغرب منا والمريكان منا
من عام ألف وتسعميّة وخمسين=وعريبيا ما غير حنا وحنا




يتبع ...

[ذيبة تميم .. !]

محمد ابن حسن والمحاورة


تقدم أن محمد كان يجمع أصدقاءه في مزرعة الجندلية
ويقيمون أمسيات خاصة في المحاورة ,
سألته عن أول محاورة رسمية له فقال :
كان ذلك عام 1402هـ , في ساحة الاحتفالات في عنيزة أيام العيد ,
وكانت أمام العملاق المرحوم حمد المغيولي , يقول محمد كان حمد في الملعب
وكان ورائي سليمان البادي فدفعني وقال :
(تراها فرصتك إلى ما لعبت معه اليوم يمكن ما يحصل لك)
فتشجعت وكنت عاتبا عليه على عدم رثائه رفيق دربه عبدالعزيز البادي رحمه الله ,
وعلى هذا المعنى بدأت اللعب معه , فدخلت ووسمت :


سلام الله عليكم عد ما هل المطر سكاب= برديّه وفيّه بين هالصفين مازونه
أنا أبلعب وأبفتح يالابنادم ذا الليالي باب = كما انّه يستمع باذنه ويقدى الدرب بعيونه

فقال حمد :


هلا يا مرحبا عد ما هل الهلال وغاب = يقوله واحدٍ نفسه عن العثرات مامونه
جذبني نورك الليلة جذبني نورك الجذاب = إلى ميّز رفيقي خطته مانيب من دونه

محمد :


يدوم بْك البقا يا شاعر ينقل له ألف حساب = وعلم العام ما ودي عن الرجال تخفونه
أنا قصدي زمان فات يوم مخلص الأنشاب = تجيهل يا حمد كنك من اللي ما يعرفونه

حمد :


ألا يابن حسن خلك معك شلفاك مثل ذياب = على قول الجنوبي ليتها للحلق مسنونه
ترانا للطرق وقت اللوازم محتسيت ركاب = ركايب وردتنا والعرب ما همب يردونه

محمد :


أنا ما جيت يم القوم ياهل المعرفة حراب = لكن الدين حلّ ولازم الدين توفونه
يقولون العرب تدري عن الصادق من الكذاب = نعرفك فارس وقت الشدايد شايل شونه

حمد :


حليلك جابك الله يالسنافي جابك الجلاب = تريد الكايدة والكايدة ذا الليل يا هونه
بعيد الفرق عن ذيك القليب متعب الجلاب = متى يا ناس تعطون الخبر وإلا تودونه

محمد :


بعد ما حِطّت الشارة تبي تخلف لنا المضراب=ونفسي ما تبي زاد يجي في غير ماعونه
تخلي عزوتك تقعد ومثلك واحد ينهاب =قطعت الما عن الجذع الموالي وماتت غصونه

حمد:


حليلك يالمغني ما تشكّى من غليث الناب = وأنا اللي طاوي قبلك صميلي قدحة اللونه

. . . يقول محمد ثم ضيعني معه في اللعب فضعت إلى أن قال :


ترى كثر الغواني ما برز فيها خلف وحجاب= أريد اللي ليا تلفنت جاوبني تلفونه
عجيب من الليالي بالليالي ما بقيت عجاب = وأنا ماهوب يقراني سليق البيض والتونه

فقلت :


ألا ياراكب الجمس درّج راعي الدباب = علشان العرب تصبح معك باللعب ممنونه
ترى منتب قليل العرف ياللي تصعد المرقاب = تعيقه والعلوم الجايزة باللعب توحونه


يتبع ...

[ذيبة تميم .. !]

مع أحمد الناصر

يقول محمد لعبت مع أحمد الناصر لأول مرة في الزلفي ,
عام 1403هـ أيام العيد , حيث لم تُقم احتفالات في عنيزة في تلك السنة ,
فذهبت أنا ومجموعة من الأصدقاء عشاق المحاورة من عنيزة وكان عددنا يقارب الثلاثين ..
فلما حضرنا وسلمنا سأل أحمد الناصر صالح العميم (دلهي) :
ما طلع عندكم أحد من الشعار عقب المرحوم (يقصد عبدالعزيز البادي) ؟ فقال صالح : إلا محمد ابن حسن هاللي قدامك ,
قال أحمد : ونعم , وبآخذ معه طرق .. يقول محمد : فقلت ما يشدّ حاشي وبالمجلس جمل !
(كناية عن الاعتذار عن عدم القدرة على مجاراته)
فقال أحمد : بك بركة , ثم قام ووسم , وكان البيت
الأول تحية , وفي الثاني قال :

شفت لي مخلوق مسلم يصوم ولا يصلي . . كان ما صلى ترى الله غني عن صيامه !

وهو يقصدني بهذا البيت .. وفجأة دخل معه شاعر مطيري فرد عليه لكن الطرق لم يطل ..
ثم ألح علي الأصدقاء بضرورة اللعب مع أحمد وشجعوني فقمت ,
وتصور أن تلاعب أحمد الناصر لأول مرة في حياتك
وفي الزلفي وعلى المكرفون أيضا .. ولأول مرة في حياتي أرد على المكرفون !
وقبل أن أذكر المحاورة لا بد من الإشارة إلى قصة لها علاقة بها ,
حيث صارت هي المعنى الذي لعبا عليه ..
يقول محمد في أول ليلة سبت بعد وفاة المرحوم عبدالعزيز البادي
مع رفيقه مساعد الغزي راعي الزلفي
إثر حادث سيارة (صفر 1402هـ) , كنا نستمع لإذاعة الرياض , فذكرمقدم برنامج البادية إبراهيم اليوسف الحادث ,
وترحم على الموتى , ودعا بالشفاء لرفيق الضحيتين الثالث وهو
عبدالمحسن العوهلي الملقب (مطوع الشعار) رحمه الله ..
ثم قال وهذه قصيدة رثاء من أحمد الناصر ,
فاستمعنا إليها وإذا هي رثاء لمساعد الغزي وحده دون أدنى إشارة لعبدالعزيز البادي
الذي مات معه في نفس الحادث , والبادي صديق لهم جميعا ,
وسبق أن لعب مع أحمد الناصر محاورات كثيرة ..
فحز ذلك في خواطر أهل عنيزة واستكثروها من أحمد الناصر ..

..

..

..


محمد :


سلامي عليكم عد ما هبت النود =بردية ذا الليل يجذب سناها
هلا يا أحمد الناصر ترى الحق مريود = ونفسك تبي تلقى من الله جزاها

أحمد :


هلا مرحبا ترحيبة تقبل الزود = عدد ما تهل الناشية من سماها
سمعت العميل يذكر لي العود= عسى رحمة الله له عساها عساها

محمد :


أنا ما ارتضي لاهل المواجيب منقود = ولكن عينك في يدينك عماها
تذكر حميد ما تذكرت محمود = وذي شغلة يا كيف قلبك نواها

أحمد :


ترى الضين يرعى في حنيظل وأبا الدود = غنم بربر اللي شحمها في كلاها
وأنا ما نسيت اللي مضى يافتى الجود = عسى الله ينسى كل قلب نساها

محمد :


أجل ليش ما بينتوا البيض والسود = أنا أعرف السلع وش بيعها من شراها
ترى الواجب إنك باذل كل مجهود = علشان بعض الناس يبتل غلاها

أحمد :


أبا الفود من بعض السلع ما حصل فود = لكن الغطاية لا ما أكشف غطاها
أنا شايب راسي على الهون والكود =أجي دون ذيك وذيك أجي من وراها

. . . إلى آخر المحاورة


يتبع ...

[ذيبة تميم .. !]

محمد بن حسن




يامرحبا بالرجال اللي لهم بين الرجال اعتبار=ماهم بمن ناس الى شافت هل العادات ينسونها
من خاطر ٍ مايغيره الزمن في ليل والا نهار=والبايته لا لقاها يترك اللقمه وماعونها



احمد الناصر





يامرحبا مرحبا يابن حسن ترحيبتين كبار=والوافيه كايده في حال والا حال ياهونها
نبغا نعرف الوزير اليا حضر ونميز المستشار=والناس تمشي مع الطرقه تشوف الدرب بعيونها


محمد بن حسن




التاجر اللي يغير منهجه ماله بقلبي وقار=والسالفه مبطيه والناس يا احمد مايعرفونها
الليلة الليلة نقصه من يمين ويسار=الشاره اللي وقفتوا قبلها وقفت من دونها




احمد الناصر





يابن حسن ويش رايك كان دارالوقت لك واستدار=العاقل اللي يميز صاحي العالم ومجنونها
الطايره وقعت باللي بها ياناس وسط المطار=سواقها مات بالله ياجماعه لا تسوقونها




محمد بن حسن





من فضل ربي زماني ماتغير ياعرب ويش صار=بعض الدعاوي علينا ياجماعه ماتخلونها
الحر من عادته ماهو بيطلع غير مثله حرار=اقولها والعرب قبلي يابومحمد يقولونها



احمد الناصر





مادمت شاعر وتفهم فالعلوم كبارها والصغار=وقف وميز وتدري في هبوب الريح وسكونها
التاجر الصيرفي مايستريح الا بسوق التجار=والحمدلله كل الروس يارجال بمتونها


يتبع ...

[ذيبة تميم .. !]

محاورة قديمة مع شاعر عنيزة الكبير حمد المغيولي رحمه الله

ولد الخال



سلام الله عليكم واسمعوا وش عند ولد الخال=مادم ان الصفوف وقوف كثر الهرج وشوله
نبي نلعب ليلة العيد بأول يوم من شوال=ولايحتاج بيبان الطرب ماهي بمقفوله

المغيولي




هلا حيت يارجال واللي قابلك رجال=متى مابان لي راس الشبح جبت الهدف حوله
نغني ليلة الجمعه ونلعب كل راس هلال=على ماقيل يارجال كلن قدر محصوله



ولد الخال




عسى يحييك رب ً بالسماء يدري عن الاحوال=ترا مافيك شك ورميت الرجال مقبوله
تجدد ما تجدد بالعلوم وكثرة الاقوال=بعد ماغبت عنا ياحمد غيبتك ياطوله

المغيولي




عساك امن الرجال اللي عليك يقلط الفنجال=ليا صاح المصيح بين فلتانه ومقفوله
ليا عاش البنادم ماتغير مدهله مدهال=يقوله واحد ٍ معكم غيابه مامضى حوله



ولد الخال




انا اخبرك وابشرك يطلع للعيال اعيال=لكن الرجل عن كل الدروب العوج مشلوله
اجل وين انت يوم انه حضر مشعان بن هذال=هذاك اليوم زاد القوم مانضج على التسوله


المغيولي




عساك امن الرجال اللي تورد والحبال طوال=ليا حن الجمل بالقيظ تاخذ بالفلا جوله
مع الصادر مع الوارد مع النازل مع الرحال= مع الطاروق والطاروق ياعرضه وياطوله

ولد الخال




حلالك يا حمد فيه الجنيه وفيه نص ريال=على كلن تراها منك يارجال مقبوله


يتبع ...

[ذيبة تميم .. !]

محاورة بين الشاعرين محمد بن حسن وعبدالرحمن الشبل


محمد بن حسن:


ســـلام رديةٍ مـــن خــــــاطرٍ ما يبيـــش = غير الوفاء من رجال العرف وقروشها
يالشبل وش صايرٍ قبل أمس عند الدويش = قالو لي إنك من اللي حاضرٍ هــوشــها


عبد الرحمن الشبل:


يــــــا مـــرحبا مرحبا واللي بداها يعيش = ترحيب يبعد ذياب الضلع ووحوشــــها
يذكر ورا جو دخنه من ورا أبو عـريش = أنوشها مــــن ورا كشمير وتنــوشـــها


محمد بن حسن:


مـــا فيه طيرٍ يطير ابلا جناحٍ وريــــش = والناس نفرح ليا بشــرت بطروشـــها
وانته تبـــارا الاصايل مــا تبارا الكديش = قلعت مريكا وقلعت يا ولد بــوشــــها


عبد الرحمن الشبل:


العلم يــــا بـن حسن واللي ذكرتوه ويش = خل الطيور ابسماها ترقب اعشـوشها
ما ودي اشعل لظاها في نواح العــريش = خل الرصاصة على ما قيل بقفـوشـها

محمد بن حسن:


يالنابغه ما نت جاهل في سوالف قـريش = ودك تهاوشك بعض الناس وتهـوشـها
وأنت متخوف تقل معطيك قطعة حشيش = لا والله إلا بدا للناس مخــروشــــها


عبد الرحمن الشبل:


اقريش تبقا على الخبزه وسمنه وعــيش = ما لي بسجادةٍ تعجبــك بـــنــقوشــــها
يــا بــن حسن لو ما بالقلب يمــك يجيش = تغرقك هاك السحابة عصر بطشوشها


محمد بن حسن:


يا قلب يا قلب ياللي من طــرفنا غشيش = كسر حصاها وكسر قبلك افروشـــها
خض اللبن يـــا دحيم ابذمتـي ما يطيش = والناس تدري بفارشها ومفروشــــها


عبد الرحمن الشبل:


بعض السوالف توردها لنا ليش لــيش = من قبل لا تظهر الحيات وحنوشـــها


يتبع ...

[ذيبة تميم .. !]

يقول محمد عن بداياته في المحاورة ،
كنا كاشتين في القويد الشمالي عام 1401هجري وجا زميلنا الشاعر احمد العقيل (ابو عدنان)
ومعه أسد المحاورة الشاعر عزيز البادي رحمه الله .
وكان عزيز البادي يسولف عن ملعبة السويل يوم حضر أحمد الناصر
وناصر الشيباني وحمد المغيولي ويقول كان مزاجي ليس مع المحاورة مشغول بأمور ثانية ويقول عجزت أرد .
وكان مع عزيز الله يرحمه عصا ، فضربني به وقال : قم أوسم
فقلت له : يابو حمد جان مثل ماجاك بملعب السويل عجزت لادور شي
فقام أحد الزملاء ولعب طرق مع عزيز وبعدها قمت ووسمت ...

محمد


ياسلام الله عليكم جماعه = ردتن يازينها والنار حيه
يابن بادي واقفٍ لك ساعه = شد حيلك جاك راع الجندليه

ابن بادي


مرحبا حيت ياراع الشجاعه = هات علمك والطواريق ابرحيه
كل رجالٍ على شبره وباعه = ان مشى بالصبح والابالعشيه

محمد


كل رجالٍ يبي ينهض شراعه = والمعاني صار له روحه وجيه
لو تشفع ماقبلنا لك شفاعه = الخطيه ياجماعه بالخطيه

ابن بادي


استمع للنشر من راع الاذاعه = لو كثير الناس ماعنده دريه
مع ذعاذيع الهوى ساعه وساعه = يارجاجيل المعرفه والحميه

ويقول محمد استمرينا على هذا الطرق الى ان غير ابو بادي الله يرحمه وقال


ياهل الملعب اللي ظوها مشبوب=العبوا والملاعب سوقها غالي
هالسنه مابها طالب ولامطلوب=كود شيٍ بعد ماجاءعلى بالي

يقول محمد فلعبت معه ولكني ما أذكر اللعب زين لعلي أسمع الشريط وأعلمك


يتبع ...

[ذيبة تميم .. !]

http://banitamim.org/upfiles/Oo078409.jpg


مثّل قبيلة تميم في مزاين أم رقيبة بمخيم الشيخ عبدالله آل الشيخ ولعب مع الزلامي والقرقاح وغيرهما وأبلى بلاء حسن

من محاورته مع القرقاح :

محمد


مرحبا بالجميع إعداد هب النسيم = والتحايا عليكم تنثر ورودها
يسلم الشيخ عبدالله وتسلم تميم = لابةٍ بالفعايل بينن جودها

فلاح


البقا يالمرحب والكرم للكريم = أنت من عزوةٍ ماتبرد جودها
خابرك قبل خمس سنين حول القصيم = والسوالف معك ما تاصل حدودها


محمد


جيت عاني من عنيزه بقلبٍ سليم = لأجل أشارك بني عمي بمجهودها
سولفوا بالجديد وخل عنك القديم = مزنةٍ شفت برقه واسمع رعودها


فلاح


مانيب بشاعرٍ في كل وادي يهيم = يقطع الشكه القشرا ومنقودها
العرب تبتعد لاصار بالجو غيم = كل ما ناحت الورقاء على عودها


وهذي بداية اللعب مع الشاعر رشيد الزلامي

محمد


الزلامي مانعرفه مير ندري عن علومه=شاعرٍ بالملعبه مبطي ويعرف بالزلامي
يارشيد الله يعز الدين ويعز الحكومه = تنصر المظلوم والظالم تحطه بالظلامي

الزلامي


الزلامي مايلومك وأنت ما تقدر تلومه = إن عرفتوا مقصدي وإلا على الدنيا السلامي
والوطا ياكثر برده والسماء يا كثر حومه = والمصيبه من حراميٍ يبا يسرق حرامي

يتبع ...

[ذيبة تميم .. !]

وهذي محاورة من الوزن الثقيل بين الشاعر محمد بن عبد الله ابن حسن والشاعر الكبير محمد السناني الجهني
في مهرجان الغضا 28 في مخيم دوانية عنيزة للمحاورة والشعر الشعبي



ولد الخال ..



يامرحبا عد ماتنشي المزون وتذرا الانسام=ترحيبةٍٍ طيبه ماتختلف طول الزماني
الليله الليله الليله يبين العلم قدام=مادام ربعي جهينه رشحت عنها السناني


السناني ..



دام البقاء يالمرحب عد ماخطن الاقلام=وعداد مايتبع مشي الدقايق والثواني
الليله العلم له سامع وله ناقد وحكام=وان جيتكم ماتخير لي مكان عن مكاني

ولد الخال ..



انته تبينا نسافر لليمن والا تبا الشام=لكن حذراك عشرك عندنا ترجع ثماني
والحمد للواحد اللي عزنا في دين الاسلام=دايم نجازي رياجيل الحساني بالحساني

السناني ..



منين مايسر الله نتجه والطرف مانام=واليا انقفل درب نقدر نتجه مع درب ثاني
الحمد لله موحد في الجزيره شرع ونظام=مافيه ذكرى لأبو زيد الهلالي والحصاني

ولد الخال ..



أجل توكل على الله يابوتركي وانت جزام=وأهل المعاني تكيف لا لقت راع المعاني
قالوالي انك من اللي شاطر بتفسير الاحلام=والحلم مايعرفه غير الرياجيل الذهاني

السناني ..



اتعبت فكري على قول العرب واتعبت الاقدام=واليوم قمت احتفظ من شان مايغلط لساني
حلمك مثل حلم يوسف جاك الاحلم صدام=احسب لها وانت صاحي لا تقول الموت جاني

ولد الخال ..



لو قال ماقال ياهل المعرفه ماهوب منلام=مايدري اني دهيته والبنادم مادهاني
ارفق ترى من يضيم الناس يابن الناس ينضام=والجن مايطلع الا كود بالسحر العماني

السناني ..



الناتج اللي حصدتوا ذا السنه من مزرع العام=مدري طلع هيل والا فيه ورد وزعفراني
ان كان ونك على هرج السعه عقدت الاكمام=بكرا تجيك العقوبه لا تقول الله رماني

يتبع ...

[ذيبة تميم .. !]

وهذي مع القويماني محمد ..



محمد القويماني



سلام يااهل المنتدى مابيـن قوسيـن الجنـاح=الضيف يبـدا باالسـلام ومرحبـا مردودهـا
ابن حسن شاعر عنيزة من نجاح الى نجاح=لـكـن علـيـه مـلاحـظـة ياهـونـهـا يـاكـودهـا

ولد الخال



يا مرحبا ترحيبة ٍ تسهرك الى نور الصباح=والناس تبذل جودها والجود من ماجودها
يا شاعر السبعان مالك من بعض هرجك صلاح=املاحظتك اللي تقوله حالفٍ ماعودها

محمد القويماني


يـا الله لعـلـك للبقاء والـبـرق فــي منـشـاه لاح=جاتـك سحابـة وانتـبـه لبروقـهـا ورعـودهـا
اشره علـى اللـي لاورد مايـارد العـد القـراح=بعض السوالف تدبل قلوب العرب واكبودها

ولد الخال



برق السحاب اللي نشا سيله على الوديان طاح=يا الله عسى كل الشجر بالدار يبرض عودها
البارحه قالوا لي انك ناوي (ن) تارد رماح=ولا حصل لك والقضيه حاضرين شهودها

محمد القويماني



ايامنا مابين عدل وميل واللـي راح راح=واظن عندك علم في بيض الليال وسودها
تراك في عصر التطور والرقي والانفتاح=كلش ميسر والدير نعرف جميع احدودها

ولد الخال



علم (ن) تبيحه يالسبيعي مير علم (ن) ما يباح=و أهل الذكاء والبخص لا يمكن تبيح سدودها
وانا خبرتك عسكري والعسكري يبغى سماح=والضابط اللي عندكم عيا يطيع جنودها

محمد القويماني



الرجل عقل وثقل والهين تطيربـه الريـاح=والنـاس ماتـدري بغايتهـا ولامقصودهـا
انته مجرب والمجرب من عنا الوقت استراح=عساك يـاراع الذلـول اتسوقهـا وتقـودها

ولد الخال


جتك الخساره وانت طمع (ن) يامحمد بالرباح=ولا تقوم الخيمه اللي طايح (ن) عامودها
مهما تجيهل من يجي للمعركه ببلا سلاح=ثارت عليه البندق اللي عابي (ن) بارودها
محمد القويماني



الـحـمـد لـلـه مـاعـلــي اخــلاف وافـلــح يـافــلاح=وان كـبـرت الـدعــوى مـحـمــد قـدهــا واقـدودهــا
نـاس تـواجـه يـاالـتـمـيـمـي مـاتـويـق مـع الـسـنـاح=وام الـكـبـايـر مـن قـشـرهـا لـطـمـهـا بـخـدودهــا

ولد الخال



عندي خبر باللي يبي يقعد ومن يبغى المراح=ياطيب بعض اصحابنا بسهودها ومهودها
القدر عيا لا يفوح وكنت احسب القدر فاح=بعض السوالف نقصه ابرك يا عرب من زودها

يتبع ...

[ذيبة تميم .. !]

هذه مرثية محمد بوالده المعروف بالخال رحمه الله في 12 / 8 / 1407 هـ
وقد نشرت في جريدة اليوم في ذاك الوقت





الحمـد للمعبـود منشـي خيالهـا=محصي كواكبها ومرسـي جبالهـا
الخالق اللي كـل خلقـه برحمتـه=عالـم دقايقهـا وعالـم جلالهـا
أمانته ترجـع إلـى حـل يومهـا=سبحانك أنت اللي بخيصٍ بحالهـا
وأبوي روحه يوم وصلـت منيتـه=جاها ملكهـا يـا إلهـي وشالهـا
شاله ضحى الجمعه لك الحمد والثنا=يالله عسى في جنة الخلـد فالهـا
آمين ثم آميـن .. قلتـه وأقولهـا=ماعاش راسي وأكثر الناس قالهـا
نطلب له الرحمه وندعي ونلتجـي=بالواحد اللي رحمته يلتجـى لهـا
مرحوم ياعودٍ به الطيـب والكـرم=المرجله ماهـوب راضـي بدالهـا
نشا علـى طيبـه وقفـا بطيبتـه=ما يوم نفسـه للرذيلـه طرالهـا
الخال يامن تجهل الخـال سمعتـه=ياكثر منهو مايعرفـه عنـى لهـا
الناس إلى وردت تميـز عدودهـا=تترك هماج الماء وتنصى زلالهـا
قالوه غيري يـوم جينـا بسيرتـه=وأثره على الله مشيتـه واتكالهـا
يالله عسى الجنه مقرك ومسدحـك=آمين ترقـد يايبـه فـي ظلالهـا
والخاتمة في صـلاةٍ علـى النبـي=عد النجوم وعد مـا بـدا هلالهـا
تمـت ولا تمـت ولكـن حكمتـي=الحمـد للمعبـود منشـي خيالهـا

[ذيبة تميم .. !]

هذا ما استطعت إيراده من قصائد ومساجلات ومحاورات لـشاعر عنيزة : محمد العبدالله ابن حسن .
مع العلم أن كل ما سبق منقول من مواضيع للإخوة في [ مجلس عنيزة ] مع بعض التعديلات البسيطة والتنسيق .
مع تحياتي وتمنياتي للجميع بقضاء وقت ممتع مع شاعرنا المميز ...

:bye1:

[ذيبة تميم .. !]

الضبيب سدير

أعجبتني هالقصيدة
ونعم والله به وبك

ماعليك زود يابن العم ، حياك الله

[دانة تميم]

لا شك مما شفت ويشاف هالحين
غديرنا ماينشرب من حثاله
اقول ماقالوا رجالٍ قديمين
كلامهم يذكر الا جاء مجاله
الزين ماودك يخلى مع الشين
ودك تخلي كل شيٍ الحاله


صح لسان الشاعر / محمد العبدالله ابن حسن

و تسلمين ذيبتنا على جمع هذه الروائع

موضوع مميز .. شكراااااااااااااا لك

[أبوتميم]

الله يعطيتس العافية يالذيبه دائما ما تكون مواضيعتس ذات طابع ولون خاص وتصاحبها الدسامه

إستمتعت هنا

[ذيبة تميم .. !]

دانة تميم
أبوتميم

هلا حياكم الله ،
تسلمون عسى الله يعافيكم ويخليكم .

[الروح]

انا اشهد إنه شاعر
قصايد في قمة الروعه
لا تحرمينا من هذه المواضيع يا ذيبـه


وانا مادور من وراكم كسيبه
الا المعرفه بالرجاجيل الأخيار

كفو والله

[ذيبة تميم .. !]

حياك الله ،،
وشكراً لك .

[محمد الربيعه]

ما شا الله لا اله الى الله


شاعر من قمم الشعر في وهرم من اهرامه


والله والف نعم شاعر نفخر ونعتز به


والله لا يهينك يا بنت العم على تزويدنا بقصائده واخباره ويا ليت ما تخليننا من جديده


تحياتي

[بعيــ(الهقــاوي)ــد]

بيض الله وجهك ياذيبة تميم وصح لسان شاعرنا (ولد الخال ) محمد العبد الله ابن حسين ..