" بني تميم هل الطعن والصحافي % عظم رقبة من دوحة ٍ مابها أحلاف "

[عتاب بن هرمي]

شاعر تميم في ديوان ابن ثاني

عظم رقبة من دوحة ما بها احلاف

قصيدة لشاعر تميم الشاعر عبدالله بن علي بن صقيه الوهبي الحنظلي التميمي في صاحب السمو الشيخ حمد بن

خليفة بن ثاني أمير دولة قطر وذلك بمناسبة دعوة صاحب السمو " لشاعر تميم " ،

وقد ألقاها على سموه في مكتبه يوم الثلاثاء الموافق 17/1/1425هـ .


بدَّيت ذكر الله على كل قافي
= الخالق اللي بالمخاليق روّاف


واخلاف ذا ياللي حماكم يخافي
= تميمي لا ختف من خاف ما خاف


ياشيخ جدانك ربيع الضعافي
= مزبان من قلبه من الخوف رجّاف


انا اشهد انك وافي نسل وافي
= من سلسلة ليثٍ بالاكوان ينشاف


قاسم مرو السيف هيف الهرافي
= مقعد صغى العيال للمال متلاف


يالحنظلي يالريف وقت الجفافي
= يالصيرمي ياللي للامجاد ميلاف


جدك خرج من حي اشيقر اسنافي
= بخيلٍ إلى رد البرى ترجف ارجاف


معرب الجدين ما هوب هافي
= حامي حمى الدوحه وبحره والارياف


اليوم جوّك يا بن معضاد صافي
= للي صفالك من عريب العرب صاف


من لا يسل لمحدبات الرهافي
= ويصطي بها فيمن بغى شاف ما عاف


كم خيرٍ تذرى عليه السوافي
= الموت لارواح المخاليق قطاف


يامذبحة للضيف علط الشعافي
= ستر العفاف البيض كاملة الأوصاف


يرتاح من جاكم من البعد لافي
= بحق من له حق مافيكم اجحاف


جنابكم في شدة البرد دافي
= سنام مجد صامدين وعرَّاف


تشرون جزلات المفاخر بالافي
= وتفدون من حكم بقصاصه بالالاف


حناظله ترسون يوم الزحافي
= لكم بسوق المجد والجود ميقاف


أهل كرم يوم السنين العجافي
= وأهل وفاء وأهل مروات وأنصاف


تنشر لكم رايات بيض انظافي
= اعراضكم واجدادكم تعرف انظاف


يامدوخين امبحثين الخوافي
= ياسراطان أهل الدغايل والأهداف


يافاعلين الخير ظاهر وخافي
= يامن لكم في كل عاصمة اوقاف


الكل منكم بالمواثيق يافي
= وان شبت الهيجا لكم فعل ينخاف


كم فارس حوّل من السرج حافي
= داروه جدانك ضحى الكون بكتاف


تعرف مواقفكم اليا جا اختلافي
= لا قامت الأمواج تلطم بالاسياف


بني تميم أهل الطعن والصحافي
= عظم ارقبه من دوحة مابها احلاف


أهل العفو عمن يريد العوافي
= امصادمة جمع من البعد زحاف


ملبوسهم درعٍ على الجسم ظافي
= القفر يرعونه ربيعٍ ومصياف


لا نشفت يوم الطراد الاشافي
= تعرف مواقفهم بمسقوف وارهاف


يا ما اسرجو من دربّت بالعسافي
= وياما ارسنو يوم الوغى كل موجاف


حدب الظهور مطويات الفيافي
= خضع الرقاب العوص سالمة الاوجاف


واليوم صاروخ وقنابل تخافي
= من فعلها بالغير ياربنا كاف


شعبك حزامك ولو يصير اختلافي
= تنشر لها البيضا على كل مشراف


والناس كل دون حقه ايشافي
= الحاضره واللي يقودون الاسلاف


بالمجتمع راكب أو ناعل أو حافي
= للخيل للي يركب الخيل محراف


ما نيب من يهرج بهرج الزهافي
= اداري المنقود مانيب زهاف


وصلَّوا عدد من حج واحرم وطافي
= على النبي ما هل بالارض هتاف


اللهم صلي على محمد

وسلامتكم

[تركي]

صح لسانك ياعتاب

وهذي ما هي غريبه على ابو علي .

[الصنديد]

يستاهلون والله مزبنت الدخيل يامال العافيه يابوهرمي..............

[عمروالندى]

الاخ عتاب بن هرمي : ما شاء الله عليك بداية قويه في المنتدى , وفقك الله

[عتاب بن هرمي]

لقيط حياك الله

[عتاب بن هرمي]

الصنديد كلامك محدن يعارضه

[عتاب بن هرمي]

عمرو الندى حياك الله

[راع الاوله]

مشـــــــــــكور ياخوي عتاب ........ واشهد انك على الوعد يانشمي

ومشاء الله عليــــــــــك اثبت وجودك بجودة اختياراتك ......... وفن سردك للمواضيع

صح لســـــــــــــــك ......... ننتظر جديد ابداعاتك ياذيبان

اخوك

سداح تميم

[عتاب بن هرمي]

ياهلابك ياسداح والله لايهينك على زين هرجك يالعزوة

[راعي الرويضة]

للرفع والتذكير بهذه القصيدة الجزلة لابن صقيه في ال ثاني حكام قطر الشقيقة .

[نجديه]

حناظله ترسون يوم الزحافي
= لكم بسوق المجد والجود ميقاف

كل بيت اقوى من الثاني صح لسان شاعر تميم وتسلم يابن هرمي على

هالذوق