هاي الشهامه والا بلاش..

[احساس الدوحة]

شاب سعودي طلق زوجته ليله الزفاف

أقدم شاب سعودي على تطليق زوجته ليلة زفافه منها، بعد أن سخرت من والدته التي كانت
ترقص في حفل الزفاف.

وقال الزوج إنه نصح عروسه بالكف عن الكلام عن والدته التي كانت ترقص أمام الحضور،
ولكنها أصرت على السخرية منها، الأمر الذي دعاه إلى إعلان طلاقه منها أمام
المدعوين، ولم تفلح جهود إصلاح ذات البين لإرجاع العلاقة، لأن الشاب تمسك بموقفه،
خصوصا أنه أعد العدة لكي يسكن في نفس البيت الذي تسكنه والدته لرعايتها والقيام
بشؤونها .

وقال الزوج لصحيفة (عكاظ) السعودية إنه اتخذ القرار لخوفه من تكرار هذه المواقف مع
زوجته وهما على أعتاب حياة مشتركة.

الجدير بالذكر أن موقف الشاب لقي استحسانا من أهل الخير. إذ تبرع له بعض الميسورين
مكافأة له على موقفه الشهم تجاه أمه، وذلك كي يتسنى له الزواج من فتاة أخرى..

[راعِ المنقيه]

شخصيه قويه
دلت على الشهامه ورجوله

صدق من قال اذ لم تستح فاصنع ما شئت

وشكرا

[احساس الدوحة]

عزيزي راعي المنقيه

القوي الله تعالى .. يعني يوم طلقها صار رجال وقوي...

كان عطاها كف وقالها بوسي راس امي .. :D

ولو سخرت منها مرة ثانيه يطلقها..:p

يعني يعطيها فرصة.. مساكين احنا يالحريم..

بس لو انا امه وسخرت مني باقوله طلقها والا بازعل عليك لين يوم الدين:mad:

يعطيك العافيه واشكرك عالمرور

[راعِ المنقيه]

سبحانه هو القوي العزيز

بعدين هاذي ما تستحي في اول ليله قامت تمسخر من امه (هذى اولها وينعاف تاليها)
ولو انه عطاها فرصه وصكه كف كان تقوم وتصكه كفين تسويها وتقلب حلبه مصارعه:p

بس هو فاهم ختمها بطلاق ونتهت السالفه بليا وجع راس

والحريم ماهن واحد فيه اللى تعادل الرجال وهن كثيرات


شكر لك

[احساس الدوحة]

اخوي راعي المنقية..

كلمة حق قلتها فينا يالحريم.. يعطيك العافيه..

[راع الاوله]

مشكوره على الموضوع الرائع ... والذى من خلاله صورتي لنا نوع من انواع الوفى والبر بالام ...

وانا اشهد ان هذا الرجل يمتلك الشهامه .... فغيرته على امهع وحبه لها جعلاه يطلق زوجته فى ليلة زواجه ..(( ترى ذبحته اللغه العربيه لسانه انعوج من التعمق فيها حتى كتاب القواعد جنبه ))........

المهم بس تراكم قلبتم الموضوع كله على الحريم .......... يعنى فيه قصه اعرفها ويتناقلونها الناس عندنا .. مدرى ان سمعتوها ولا لا ... بس هى ان بنت عقب عرسها باسبوع طلبت الطلاق من زوجها ... والسبب لانه ترك امه واخته فى بيت لحالهم وحاول ينقل لبيت جديد هو وزوجته ..... طبعا تستغربون ليه بس هذى البنت زعلت يوم شافت زوجها يترك امه وهى مره عجوز يتركها لحالها ولا بر فيها ... فطلبت الطلاق لين اخذته ....

فالمقصود ان الشهامه عند الجنسين ....... وموب كل زين يكون عند الرجال قبل الحريم ... لا تنسون ان اول من اسلم مره وهى امنا خديجه رضى الله عنها ..............

اما انت ياراعى المنقيه ........ من موضوع العزوبيه وانت قالب احد اعضاء موسست حقوق المراه ..... هههههههههههههههههههههههه ياحبيلك يارجال نشوفك لا اعرست وش بتطلع ....

تقبلوا تحياتي

سداح تميم

[راعِ المنقيه]

وش نسوي ياسداح مالنا غنات عنهن وش حنا بلياهن والله صحيح


والله جبتها ياسداح دايم انت عبقري سبحان الله

ابقترح يكون في هذا المنتدى ( منظمه حقوق المراه ) واكون انا رائيسها ونت نائب الرئيس
وش رايك يالعبقري ههههه

[احساس الدوحة]

اخي سداح..

طلبت الطلاق انه ترك امه؟؟؟ والله نادره هالانسانه .. الحين الحريم يدورون الاستقرار.. في جاره لنا خلت زوجها وحيد امه يطلع من عندها ويجيب لها خدامه .. وقالت ان البيت ضيق ما يكفي .. وترست البيت الجديد اغراض وخلت غرفه للاطفال وغرفه للالعاب وغرفه للكمبيوتر وغرفه لنومها وقالت حق ام زوجها ما عندي مكان كان خذتك معي..

شكرا عالقصه .. يعطيك العافيه..

[احساس الدوحة]

اخي راعي المنقيه..

اكيد مالكم غنى عنا.. حنا نصف المجتمع.. بدونا ما تكمل الاسره..

بس اقول تبي في المنتدى منظمه حقوق المراة؟؟ وانت الرئيس وسداح النائب؟؟

والله واحنا وين رحنا؟؟؟

[راعِ المنقيه]

لا تستعجيلين اصبري شوي
ابجتمع انا وسداح ونبي نعلن عن وظائف شاغره بس اصبرو علينا شوي
والله تطورت ياسداح من مشاغب بالدراسه الي نائب رائيس
هههههه

وش دعوى انتم فوق روسنا !!

[تركي]

لا الهواء شرقي اشوف .


ما شاء الله عليكم من مليشيات إلى تنظيمات سرية منتب سهلين وينك ياعمرو الندى تشوف .

[راعِ المنقيه]

يا اخي انت وش فيك علينا
محد يسلم منك ابد
لا وجاي تحرض بعد
ايييه لو لى سلطه كان وريتك بس خله يجتمه الفريق

[صقر تميم]

هههههههههه اما منظمة حقوق المرأة ويرئاسها رجال

لا أموركم متيسرة الحمد لله

اقووول ياراعي المنقية الفريق وصل بس باقي الضبي عشان يكمل فريق الانقلاب
الفريق مكون من ( صقر تميم ، سداح تميم ، الضبي ، والعضو الجديد المعارض راعي المنقية )


احساس الدوحة الشهامة شيء رائع بس لو المعرس واحد رخمة كان جلس يحش مع زوجته على امة :D

تحياتي :D

[احساس الدوحة]

اشكر الجميع تفاعلكم مع الموضوع ..

لا تغيرون زبده السالفه ..

كل اللي في الموضوع واحد طلق مرته ليش طالت السالفه مادري؟؟؟

[تركي]

ليه طالت السالفه

هم اللي يبون المشاكل ولا انا مسالم مية بالمية .

[ظبيانية]

تعرفي نفس هذي السالفه صارت معنا بالامارات وبعد قام الرجال وطلقها لانها تهزءت بامه يوم كانت قاعده ترقص بس عندي سؤال ليش هي ترقص من الاصل والله احسن لها لو انه كانت قاعده مغززه مافي داعي للرقص خليها علينا احنا البنات اللصغار مو صح كلامي
وشكرا
اختكم لولا

[احساس الدوحة]

اخوي لقيط انت اطلع منها وبتقصر السالفه.. يالمسالم..

اختي لولا.. مسكينه ما تفرح في عرس ولدها .. بس كان احسن ترقص خماري..

[تركي]

الرّسالة الأصليّة كتبت بواسطة احساس الدوحة
اخوي لقيط انت اطلع منها وبتقصر السالفه.. يالمسالم..




أشوف كن الحزب ضم عضو جديد


بس اطلع منها لها كم معنى الصراحة

خفت انا

:D

[ظبيانية]

لا اختي اسفه كنت امزح والله بس اكيد هذي القصه اثرت فيني لانه ظاع الاحترام في هذا الوقت واصبح كل شي فيه مظاهر يعني البنت ما تتزوج الى للمظاهر عشان العرس والزفه وتفكر بعد البنات شو راح يقولوا على الفستان ولا التسريحه ولا ... الله يعينا جميعا في هذا الوقت
وشكرا اختك لولا

[احساس الدوحة]

لولا حتى انا امزح

:D:D