ديوان الشاعر أبوعمر اليحيان

[أبو عمر اليحيان]

(الحب ما يبذر بأرض صباخي)
هذه القصيدة سبق وأن نشرتها في صحيفة الرياض صفحة خزامى الصحارى عدد13414 وتاريخ6/2/1426هـ أقدمهاأهداء للمنتدى الكريم0
الحب ما يبذر بأرض صباخي=والشبرمة ما جت بتينة وخوخة
والحبل لو شديت لابد راخي=والقدر من حره يطوح ببوخه
وقت تعلى فيه حتى الجخاخي=والخبل يلبس فيه تاج وجوخه
يقول لك أهلا وسهلا وياخي=مادام له حاجة ويحبل فخوخه
وباكر إلى منه قضا بالصراخي=يقابلك والله يكافي طخوخه
مدري أختلاف الناس وإلا المناخي=أنشد رجال العرف وأنشد شيوخه
وراسي من اللي شفت صدع وداخي=ولا فادني طب الطبيب ومروخه
وأنشدك ياللي شاب راسه وشاخي=أنشدك شفت الطير همل فروخه
وأقول لك ونا نذير وناخي=ولدك لا يمشي دروب الدلوخه
ولا تفرح ليا شفت فيه انتفاخي=جسم بلا عقل مذلة ودوخة
ولا يشغلك مال وجاه ومناخي=جسم بلا عقل مذلة ودوخة
وأصحى السفر لديار لين ورخاخي=وولدك بالحارة يمارس طروخه
درب الردى ذلة وفيه إلتباخي=والطيب لأهل العز باب وخوخة
مثايل سارت مسير الطخاخي=ومسيرها مابه كلوفة وصوخة
وعد الخطا من هجر حتى كلاخي=صلوا على اللي عزنا في شموخه
أبو عمر عبدالعزيز بن محمد اليحيان
آل مشرف التميمي


الشعراء
(15/ 8/1425هـ)

[أبو عمر اليحيان]

هنا يطيب لي أن أضع رسالة تقدير واحترام للرواد الأول الأساتذة الفضلاء من أعمام وأبناء أعمام كرماء نهضوا بالمنتدى التميمي إلى الدرجات العلى من السمو والنجاح وذلك بجهدهم بعد توفيق الله ثم عرضهم لنماذج من إنتاجهم الشعري الراقي ولقد قرأت بعضا منه ووجدت الفائدة والإمتاع بعد أن كان لي الشرف بالانتساب لهذا الصرح الشامخ ,أكرر الشكر لأساتذتي الأعزاء وأستفيد منهم وأتعلم ولن أجود بمعشار ماجادوا ولن أستطيع ولعل حبي لهم وللمنتدى والقبيلة خير شفيع لي عندهم بالقبول0
أساتذتي الأجلاء أستأذنكم بالمشاركة بهذه الأبيات البسيطة والمتواضعة والتي لاتفي بما وجب علي من حقوق فأرجو قبولها وغض الطرف عما بها من نقص وخلل وعوار0


(تميم يا عز العرب وأرتكازه)


أبوعمر يكتب ويرسل جهازه=والحب مابين المغاليق مكنوز
سلام ياناد رفيع طرازه=نادي تميم اللي به العز والفوز
ناد عزيز ولا بصرحه هزاره=وفيه العلوم الحاليه حالي الموز
ماضي تميم اللي نجح بامتيازه=وحاضر تميم اللي على عز ويجوز
واليوم أنا سجلت طمع بعازه=حب ووفاء وأصور الحب برموز
تميم ياعز العرب وأرتكازه=من ضدكم يصبح شريد ومنحوز
يصبح وعزه مايساوي بيازه=ذليل شره بين الاضلاع مغزوز
وحفظ العهود أثمن وأغلا حيازه=ولكم بحفظ العهد تصنيف وبروز
أهل الكرم والجود عزه عزازه=وتاريخكم واضح ولاهوب ملفوز
ولاهوب جامد ميت مثل الجنازه=ويصعد ويرقاللسماء فوق وينوز
وان جا نهار طراد والا لزازه=أنتم لكم قسم مقدر ومفروز
والنور مايحجب بظل القزازه=والباطل مهمش وراعيه منقوز
وتميم يافخر نهض ضغط فازه=ولايلتمس ولايبي وزن وفيوز
هاذي تعابير برخصه مجازه=أرسلتها بعنوان للطيب مدزوز
والعذر للي جا يختّم جوازه=والحب في قلبه كما النار بقزوز
ولاسيّر بقلبه علايم حزازه=سيّر يبي علم منظم ومرجوز
وصلوا على اللي تابعه في مفازه=الهاشمي أعداد مطلق ومحجوز

*1اللهم أجعلنا وأياكم بمفازة من العذاب

أبو عمر عبد العزيز بن محمد اليحيان آل مشرف التميمي

(الشعراء)
4/3/1427هـ

[أبو عمر اليحيان]

صورة أعرضها عليكم بقالب فكاهي وهي تجسيد لنمط حياتي يعيشه الكثير من أبناء مجتمعنا0
إنها صورة للتعامل مع السوق المالي والارتباك الذي كان له أثره على كثير من المتعاملين0
أصدقكم القول وأقول:لم أمارس هذه العملية من الأساس ولكن مما شاهدت كانت هذه الصورة ومن الممكن الإطلاع على نسخة منها في عدد اليوم 13801 الجمعة9/3/1427هـ الموافق 7/4/2006م صفحة خزامى الصحارى من صحيفة الرياض0
ساهمت وأتابع الأسهم على الشاشه**وسيارتي بعتها والبيت وعفوشه

واليوم أنا أشوف بعض الناس منحاشه**وكل(ن)تحامى على الباقي من قروشه

وأمس (ن) أنا الشيخ راع المال والباشه**واليوم أنا والفقر يهوش وأهوشه

ومؤشر(ن) أنسدح ثم غط بفراشه**والبلعه اللي بلعها عظام معروشه

وليا توقظ مسكني مسك كماشه**دراهمي خلصت والربح مانوشه

والله يستر من الأسعاف وأنعاشه**غطست غطسه من الأقدام للشوشه

وشوك(ن) وطيته برجلي ضاع منقاشه**وأجرد حصيلي مغير أزعاج مع دوشه

ويالله ياللي رزقت الطير بأعشاشه**تبعث سهمنا الذي ميت على عروشه

ويامفصل الثوب فكر قبل بقماشه**ولا تخدعك خرقة (ن) بالصبغ مرشوشه

وليا أنجرحت أنصحك بالقطن والشاشه**وأن كان أخذت أبرة (ن)لاتكون مغشوشه

وعلى النبي عد برق(ن) لاح ورشاشه**صليت والنفس ممروضه ومجروشه

أبو عمر عبد العزيز بن محمد اليحيان آ ل مشرف التميمي
الشعراء

[أبو عمر اليحيان]

السلام عليكم ورحمة الله وبركاته وبعد:
صلى الله عليك يا رسول الله رغم أنوف الحاقدين ورضي الله عن صاحبيك/ حسان بن ثابت وثمامة بن أثال وعن كافة أصحابك الذين ناصروك وعفى الله عمن جاء من بعدهم مقتدياً بسنتك ومناصراً لها وإنه لمن المؤسف أن يتطاول الأقزام ويستنسر البغاث في هذا الزمان ولهؤلاء الأوغاد الذين تعرضوا لشخصيتك وما نالوا غير الذل والعار أقول ولا أفي بحقك بأبي أنت وأمي يا علم الهدى ويا قائد الأمة:
اليوم للدنمرك حس ولجاليج**وإن خربت الجبنة يبي يصير صجه
وحليبهم خايس بوسط الصهاريج**ويثغي البقر يبغا مع الليل هجه
وجيرانهم وأصحابهم شعب نرويج**عقب الحصار بيتبع المزن عجه
نبي نقاطعهم وذا نوع تفريج**للقلب من فعل غدر به وخجه
ولا نسمع أعذار تلامع بهاريج**بأعلام لامنه سرى الليل وجه
نبينا ما هوب سلعة وترويج**مكمل شرعه وصومه وحجه
نبينا ولنا معزة وتتويج**ونرفض كلام فيه هزه ورجه
وصحيفة تنشر سخافة وتهريج**وخذت لها في عالم النشر سجه
وتنشر صور وتبنج الفكر تبنيج**هذي نتايجها ضياع ودجه
وعلى النبي صلوا وجيه مباليج**والحق باب وكل طيب يهجه
والتحية والتقدير من أبي عمر عبدالعزيز بن محمد اليحيان
آل مشرف التميمي
من بلدة الشعراء
(9/1/1427هـ)

[أبو عمر اليحيان]

أيها المنتدى الكريم أقدم لكم هذه القصيدة الغزلية التي سبق وأن نشرتها بصحيفة الجزيرة (صفحة مدارات شعبية)العدد رقم 11805 وتاريخ 13/12/1425هـ أرجو أن تحوز على رضاكم
الله من قلب عرض له مطاريــــــــــش**من عقبهم يارد حياض عطــــــــاشي
لا والله إلا نكدوا صافي العيـــــــــــــش**لين الجسد عيا يطيق الفــــــــــــراشي
وأونست في صدري هموم نواغـــيـش**وأثر الهوى ليله على القلب غـــــاشي
بأسباب من جسمه كما ناعم الريــــــش**مصيون ماناشه ردي الغــــــــــراشي
وعين كما عيون الحرار المواحيــــــش**في راس ميهاف ودونه عكــــــــاشي
وعود كما نبت سقته المغابيـــــــــــــش**ولا حال حول إلا واديه مـــــــــــاشي
مازيننه بايرات الدناديـــــــــــــــــــــش**يوم أن غيره زينهن غشــــــــــــــاشي
إلا نشدته أوجز الرد في ليـــــــــــــــش**ليش أن لك قلب بالأ حزان نــــــــاشي
ليش أن قلبك بالهوى عانق الطيـــــــش**العقل نعمة والتوجد بـــــــــــــــــلاشي
مايدري أن القلب جابه نواهيــــــــــش**وحبه بصدري فاح فوح وطــــــــاشي
وجدي عليهم وجد من ساكن بيــــــــش**وأهله ورى سيلان جــــوعــا عطاشي
أو وجد من قوم زروع ومعاريــــــــش**وراعي حلال ولا بقي غير حـــــاشي
من عقب ضافن من حقـوق المراهيش**يمطر برد ماهوب رش رشـــــــــاشي
وأمسى بلا مرزق ولا من معاويــــــش** في ديرة الجود فيها غبــــــــــــــــاشي
عليك ياللي صان عرضه ولا نــــــيش**اللي ماهوب بغرة النـــــــــــاس واشي
وأصلك ماهوب من الرخوم الدراويش**اللي على هافي المعاويش عــــــــاشي
عليك ترحمني ترى منك مابــــــــــيش** غير الوصل ضمين ورد له مشـــاشي

أبوعمر عبدالعزيز بن محمد اليحيان آل مشرف التميمي
الشعراء
24/11/1425هـ

[أبو عمر اليحيان]

أستأذنكم بعرض رؤيتي الخاصة لفئة من فئام المجتمع لها حضورها في سواد المجتمع وعامته ,تلك مشاهدتي الخاصة والتي ٌرفض قبولها في الصحافة ذات الإطار المقنن بحكم مثالية المجتمع أعرضها هنا ولا أدعي أنها أس الصواب وعماده أعرضها وأقول لا بأس أن نختلف في وجهات النظر ولكن العيب إدعاء المثالية المفرطة في المجتمع وعدم قبول النقاش فمع التحية شاهدوها


أبو عمر وده بإشاعة وتشخيص**تشخيص للحالة بلا لبس ونقوص
هبت هبوب أخلفت راعي الغيص**وفي نجد ضاع اللي سرح يتبع العوص
ويالله دخيلك بالنخل ولع الشيص**وجا بالتمر عقب الحلا مر ونغوص
وقناصة عقب الوعل تفرس النيص**وتعدل الدنيا بمواثيق ونصوص
وترج ما وزنة بميزان ترصيص**وعلى اليسار تدور دروب وتحوص
والمرجلة بالسوق أسهم وتخصيص**والعز حازه راعي العزف والبوص
والشورت يزها مقصص الشعر تقصيص**الناعم اللي لينه ألين من الخوص
في شارع الحارة تسكع وتلويص**وعشاه يطلب تالي الليل مخصوص
هيس ربص في منقع الذل تربيص**وعن المراجل يغسل يديه ويموص
وبعض البنات تمحص السوق تمحيص**ودايم وهن مسيار للسوق ونكوص
وخياط هندي يقيس بتفصيص**مقياس ثوب بالموديلات مخبوص
واليوم أبا أنشد عارف الحال وبخيص**هو شاف حر ياكل الحب مع صوص
وقت عجيب غادي حيص مع بيص**وهذا هو الواقع ونا منه مقروص
وفي جملة وحدة أوضح بتلخيص**العز لأهل الجود والذل للصوص
والطيب له قيمة وجمرك وترخيص**والثوم ريحه منكر أوراق وفصوص
وختامها من غير صد وتمليص**صلوا على الهادي بلا شك وخروص

أبو عمر عبدالعزيز بن محمد اليحيان آل مشرف التميمي
الشعراء
5/5/1425هـ

[أبو عمر اليحيان]

(زيد) ولا غيبة لمجهول نموذج صارخ لفئة من فئام المجتمع له حضوره في سواد المجتمع وعامته ولا أحد ينكره ،تلك رسالتي إليه وما هي إلا وجهة نظري الخاصة ولكلٍ الحق المطلق بوجهة نظره ولا عيب أن نتباين في الرؤى و الأفكار ولكن العيب أن ندّعي المثالية في المجتمع ولا نقبل النقاش0
تعذّّر نشر هذه القصيدة في الصحافة ذات الإطار الضيق والعطاء المقنن وأعرضها هنا من خلال هذا الموقع الرائد ومجال الشبكة العنكبوتية أنقى وأرقا ومداها أوسع وأرحب وللأخوة المشرفين الفضلاء الحق في الحذف والاستبعاد

يازيد أشوفك تايه الفكر منكــــــوس ** وشخصيتك شكلتها لباس ممطــــوط
وشماغك اللي فوقه عقال ممســوس ** مصنع في ديار الإفرنج والـــقــــوط
وسيارتك صناعها خباث ونجـــوس** ولهم أشوفك تلهث بكاش وقـســــوط
وطعامها البنزين تشريه بفلــــــــوس ** وفي كل شهر تغير جنوط بجنـــــوط
خبل تجمع لك طرافيش ونحـــــــوس ** بالحارة اللي صارت إزعاج وفحوط
وللكورة تفصل موديلات ولـــــبوس** ولامحصل كاس ولا حايز نــــــــوط
وبالمطعم تنفذ على رز مكبـــــــوس ** ثم تلعطه واللي مع الرز ملعــــــــوط
وبالنوم ياجودك ولاجدت بــــدروس ** وياجودك بلعب الورق وأم الخطـوط
وياالناعم الي مادرى ببرد وشمـوس ** ومكيف الغرفة مع النوم مضغـــــوط
يامشيم القصة عن الحلق والمــــوس** و في جيبك تّشيل لها أدهان ومشوط
من شوفتك قلبي من الهم محمــــوس ** مابك حيا جنسك مشكل ومخلـــــــوط
لو تدعي انك فارس فأنت مفــــروس ** وانت القزم منتب مع الناس شمحــوط
وترى الثعل لو كان مكار ويســوس ** يـكــرم عنه ذيـب بـلـحــالـيـح ومـلـوط
تقول انا حالي كما الغرب والـــروس ** ولا ظن ماقلته من القول مضبــــــوط
الغرب مرسل له مداوير وعــــسوس ** لسطح القمر وانته مع الفن مسعــــوط
وعودك يغث السمع ويفجر الـــروس ** يقولها اللي منك ماهوب مبســـــــــوط
ماقالها اللي في هوى الغرب مهووس ** ويرسم أثر حب من القلب ممعــــــوط
أحب فيهم علمهم شكل وجنـــــــــوس ** وحسن النظام اللي من النفس مسـفـوط
وإلا مناكرهم لها بغض محــــــسوس ** عندي وعند مميز رفع وهبـــــــــوط
واليوم لوك محتزم وأخذ قـــــــــــوس ** ماهمني قول بتمليه بــشـــــــــــــروط
حبلي ترى يامرخي الحبل ممســوس ** و فوق الحروف أبا أرسم أشكال ونقوط
والله لأخلي وضعك اليوم محيـــــوس ** واني لخلي كهربك ضارب شــــــوط
وخّر عن الأجواد ياسوسة الســـــوس ** ترى الذنب مسبوق دايم ومقـــــــلوط
وتاريخنا صرح ولاهوب بالفــــــوس ** يهدم وهو عندي على الراس محطوط
والماضي الزاهر ولوكان مرمــــوس ** من يحفظه كساب خير ومغـــــــــبوط
وانا مع الأجواد ماشي ومريــــــــوس ** ولي الفخر قول موثق ومخطــــــــوط
وانته ترى فكرك تعاشيق وتــــــروس ** يغيره خايب وفاسد ومسخــــــــــــوط
ها شغل الموتر ونحره لطعــــــــــوس ** والعب على كيفك ترى مانت مربــوط
يالهيس يصفق لك مهابيل وهــــــيوس ** وانته تحسبك عنتر شايل ســـــــــــوط
واظن تالي عمرك قياد وحبـــــــــوس ** والعقل من باقي بواقيه مفـــــــــــروط
يازيد قولي لك مفصل ومقيـــــــــوس ** وأستثني أهل الخير عن قول مغلـــوط
وأستغفر الله من ضرر خلق ونفـــوس ** واستغفر الله من تخاليف وشطــــــوط
وأختامها أصلي على قايد الشـــــوس ** المصطفى مابين الصبح بخيوط
أبوعمر عبدالعزيز بن محمد اليحيان آل مشرف التميمي
الشعراء
(4\5\1426هـ)

[أبو عمر اليحيان]

أودع وداعه

أقدم لكم هذه القصيدة الغزلية والتي سبق وأن نشرتها بصحيفة الجزيرة (صفحة مدارات شعبية) بالعدد رقم 11902 وتاريخ 11/3/1426هـ أرجو أن تحوز على رضاكم


قفا نهار العيد وأودع وداعه**وداعه يذوق منها وأنا أذوق
قلبي يذوق السم في كل ساعه**وهو مذوقه ينعش الروح ويروق
والقلب سمه بين الأضلاع زاعه**وضخ الذي باقي من السم بعروق
ورمح الهوى ما أخطاه صابه ولاعه**وأمسى بخير وأصبح الصبح مشلوق
وقبل الفراق أحسب بقلبي مناعه**ونا أحسبه بالصدر راكد وموثوق
وأثره غدى منهوب غصب قلاعه**في يدين غرو بأول العمر مطفوق
مجهول ما نشدت عنه الجماعه**أخاف شي يجرح النفس ويعوق
والله لأحفظ السر ما أكشف قناعه**وإلى فضحني قلت مسموح برفوق
حيثه علي غالي وشفق سماعه**لو هو يقول الزور هيض بي الشوق
والشوق ما له عوق عالي شراعه**وأول معاني الشوق حسن بمنطوق
وعهد الهوى يا وافي الحسن راعه**لابد تعطي حق ثم تاخد حقوق
والحب ما يشرى ولا قيل باعه**راعي هوى لاقيه مجلوب بالسوق
ونا معك يا لترف راع البراعه**لك ما ملكت أدفع ونا فرح وأسوق
قلته وراسي مرتكي له ذراعه**سهر وليلي يعصف رعود وبروق
ويالله لعل السيل يسقي تلاعه**ضلع يروده مبدل الوصل بعقوق
أبي لعل الزين تهدى طباعه**ورجله تدوج بوسط عشب وزملوق
وليلي يوادعني وصبحي شعاعه**فيه أتذكر نور باهي ومرموق
وكيل الهوى مبخوس مده وصاعه**واللي عدى به لو سبق يوم ملحوق
يقولها اللي سهر يملي يراعه**والحبر دم ويكتب إحساس مع ذوق
وعلى النبي صليت حق وطاعه**أعداد ما يمشي على القاع مخلوق أبو عمر عبدالعزيز بن محمد اليحيان آل مشرف التميمي
الشعراء
(2/1/1426هـ)

[أبو عمر اليحيان]

يالها من منتديات كريمة ,ويالها من صفحات مشرقة بتاريخنا الآسر بجماله وحاضرنا المشّرف بعلوه وسموه 0
لهذه المنتديات يجب البذل والجود من كل صاحب موهبة وقلم برا بقبيلته الكريمة والعظيمة قبيلة بني تميم,أقول هذا وأنا آخر وأقل من بذل وجاد وما جدت غير بالنزر اليسير وبقلم به من العلل ما تلاحظون وتشاهدون 0
الأعمام الكرام أبناء الأعمام الكرام أصحاب الفضيلة العلماء أصحاب المواهب والكتاب والشعراء وأساتذة الجامعات من بني تميم وأنتم كثر ولله الحمد, كم نسعد بمشاهدة فيض أقلامكم وأنتم الكرماء وأبناء الكرماء ولنا الفخر بذلك0
لايفوتني هنا أن أشكر القائمين على هذه المنتديات الكريمة وهم بفضل الله كوكبة موفقة من أبناء هذه القبيلة الفاضلة قاموا بالمراقبة والأشراف على أكمل وجه ولهم منا التقدير والاحترام وجهدهم لا ينكر و لهم منا السمع والطاعة0
أسال الله التوفيق والنجاح للجميع وإليكم هذه الأبيات الأخوانية البسيطة ويا حبذا الإطلاع وأتمنى القبول


ســـلام يانـــــادي الكرام الأماجــــــــد=بني تميم العز والخــير والجـــــــود
والقــــاف طاب وزان والحــــب واجد=حـب بوسط الصـــدر ثابت ومشدود
ربي وانا طالــــبك راكــــع وساجـــــد=يارب تجمـــــعنا على عـــز مشــهود
وتاريخــــنا معروف نبحــــث وناجد= نلقا بحور مالــــها حــــــد وحــــــــدود
وقـــــت مضى مابين فــــازع وهاجد= و أجدادنــــا فخر على اللين والكـــــود
ليوث حرب وعامـــــرين المساجـــد=ورجـــــال ماخـــــانو مواثيق وعـــهود
ولاهمـــــــــنا خـــــلاط هرج ملاجد=والعنقري بـــــداح بالطــــــيب محمـود
حاز الظفر والخيل بالحــــرب راجد=وهذا مثل من عـــــــدة أمثال وشــــهود
وتميم وقت الحرب تقــــــــبل عراجـــــد=وقروم لاجا يوم عـــج وبـــــــــارود
ولانـــــاب من ينـــــكر ولاناب باجد= حق لأحــــــــد والطيب شايع ومعــــدود
بكل العـــــرب ثابت مديم التواجـــــد=واللي حكى في عرض الأجواد مردود
[size=4]الود والتقدير والأحترام للمنتدى الكريم من /
أبي عمر عبد العزيز بن محمد اليحيان آل مشرف التميمي

[أبو عمر اليحيان]

في يوم الخميس الموافق 22/10/1426هـ كان لعائلتنا اليحيان آل مشرف التميمي شرف اجتماع فرع آل مشرف من تميم الفخر والجود في مدينة الدوادمي وكان يوماً حافلاً بالحب والوفاء وكان من ضمن من حضر هذا الاجتماع المبارك الشاعر الكبير متعب بن عثمان السعيد المشرفي التميمي وقد ألقى في الاحتفال قصيدة موجهة لأسرتي وخصني بها شخصياً ومطلعها


يا راكب اللي سرعته كنها الميق = قبل صلاة الصبح شد الرحالي
من ديرة ابن سغيد يا فارج الضيق = لديار ربع يحتمون التوالي

إلى أن قال:

لبو عمر بكتب جديد الطواريق = أبيات أعدلها على كيف بالي

فأجبت أستاذي الشاعر الكريم بالقصيدة التالية:


طيب الخزامى وزاهيات الزماليق=ترحيب بآل سعيد أهل المعالي
يا مرحبا وأهلا بحرار الشواهيق=أهل الوفاء والجود وأهل الكمالي
أهلا بني عمي وحلوا الطواريق=طابت بكم ولكم نسوق الجزالي
وأهلا بمن هو يارد العد ماذيق=قبله وجانا بالمعاني وقالي
قول كما حلو العسل فكة الريق=وواد عليه الوسم أمطر وسالي
متعب نظم وأبدع ولا ساق ماسيق=قبله ولا جاب المعاني هزالي
ويسوق له قاف موثق بتحقيق=ولا جاير قوله ولا قيل مالي
ويكرم عن هروج عجاف وتنويق=هذر على السامع كما حر صالي
ولا قال له قول دعايه وتسويق=ولا قال نجم سهيل يقدح شمالي
واليوم نفخر بالوجيه المطاليق=ونفرح ليا لاحت بروق الخيالي
ونجد بها حب ووجد وتشويق=وتفرح ليا جاها حبيب وغالي
غالين يا آل سعيد من غير تفريق=والصرح ما قوم برمل هيالي
وتاريخكم ما جا بغش وزباريق=تاريخكم خطط بطيب الفعالي
ولـ آل السعيد يدنق الخصم تدنيق=ولا دنقوا يوم لزرق الثعالي
وزرق الثعال لها جحور وخناتيق=وآل السعيد أسود بأرض سهالي
وآل السعيد ذيابة تطرب طويق=وتطرب فيافي نجد لا جا مجالي
وفيما مضى مروين شلف مذاليق=وعدو حيود بالمعالي طوالي
وقلب الخصيم مشلق بموس تشليق=وخلوه لا يفخر بعم وخالي
واليوم ماشفنا رخوم وغرانيق=شفنا الحرار اللي علت فوق عالي
شفنا فروع بالمكارم مواريق=والفرع من ساسه ولا به جدالي
قاموا بسلم أجدادهم خير تطبيق=سلم لحفظه مرخصين الحلالي
وسلم الشجاعة ما لهم عنه تفهيق=وحال الخصيم بسوء مع خبث فالي
والضيف محشوم مكرم ولا عيق=ويرخص له الدينار وإلا الريالي
ويا تاجنا يا آل السعيد الوفاء أطيق=ولا أطيق فرقاكم وقولي عقالي
وبأرض الكويت أنتم رجال مسابيق=وتاريخكم واضح بأول وتالي
وأنتم لنا عز ليا خيم الضيق=وحنا لكم درع ولا به خلالي
نمشي على عز مع دروب توفيق=وأهدافنا ماهي حلوم وخيالي
وحديدنا صلب ولا هو مصانيق=وقول بلا معنى علامة خبالي
ولا نسمع اللي له ترانيم وزعيق=وحنا نشيل حمول لو هي ثقالي
ونعوذ بالله لا نكر صوت بنهيق=ويثبت دخول الشهر شوف الهلالي
ويا ما وردنا للعدود الدغاريق=وخصيمنا ضمي وهلك وبالي
وفوق العدود منصبين الزرانيق=وعليه دراجه وفوقه محالي
وتدرج محاحيل رشي مصاليق=وغروبنا تنزح قراح زلالي
وآل المشرف ما لهم بالمطافيق=ولا همهم من سن سنة هبالي
وأسلومهم ما هي تشكل وتمليق=وأحرار ما تفرس فروخ الكحالي
وعدوانهم لو هم عليهم مداريق=على العدو دارت نحوس الليالي
ولا همهم روس العفون الزواريق=ووقف العدو بالشمس دون الظلالي
وقولي كسيته غاليات المواريق=ومتعب سبق قبلي بصاعه وكالي
ولا قال أبو عثمان خيق ولا بيق=والعم بن سكران قوله مثالي
وأدخل بحور مظلمات غواريق=وبعد الولي توجيه متعب مثالي
وفكري بها قدم ووخر بتبريق=وصورتها تصوير وأرضيت بالي
ولأهل الوفاء ماحدن يقدم نحاويق=والطيب له حد محدد وجالي
ويالله من الجهراء لدار المرازيق=بالغيث ثم تزهر ديار محالي
وفي أطرافها تلقى الزبيدي مفاليق=والخير عم الأرض دار ومفالي
وعلى النبي عد النجوم المشاريق=صليت ثم أكملت وأختم مقالي

أبو عمر عبدالعزيز بن محمد اليحيان آل مشرف التميمي
الشعراء
(25/10/1426هـ)

[أبو عمر اليحيان]

بسم الله الرحمن الرحيم(زيد) ولاغيبة لمجهول شخصية مضطربة أتخذ لسانه معول شر وأداة قدح وهو مثال واضح لكثير من أصحاب النفوس المريضة,ولقد قلت هذه الأبيات بحقه ولا أريد إيراد أسمه حفظا لحق المنتدى وليس مراعاة لمشاعره فهو ومن على شاكلته لا يستحقون التقدير وإنماالتقدير والاحترام والحب والوفاء لكم أنتم أيها الشرفاء أعضاء وعضوات المنتدى الكريم (سبق نشر هذه القصيدة بصفحة خزامى الصحارى بصحيفة الرياض)

هم سهج قلبي وبالصدر ساجي=وأصبح يرافقني ولا عنه مخراج
كني جلاوي بين الأجناب لاجي=وإلا كسير عشرة أشهر ولا داج
يا زيد قول قلت كدر مزاجي=والفكر غاد به غرابيل وأزعاج
والكسر ما يجبر بلوح الزجاجي=ولا أحدن يصدر بالرشاء فوق دراج
(تاطا السريح عماد) ويش أنت راجي ؟=لا تحسبن غربي على الطي زعاج
وقولي أنا أعده مع الناس تاجي=ومحفوظ بالمجلس ليا طاش هراج
ولا ناب من يسمع صياح الدجاجي=أسمع كلام عالي الوزن بهاج
وأجلس ونا مرتاح بأرض زراجي=أخير من مجلس به السوء دراج
وترى المعاني مثل نور السراجي=في ليلة ظلماء للأصوات لجلاج
ويا زيد تبغى الوضع فيه أنفراجي=وإلا تبي بابه بقفل ومزلاج ؟
وأعلم عقب روج السحايب عجاجي=وعقب الركود البحر ينسف بالأمواج
وترى الملح لا ثار يوم وراجي=الموت لقلوب المعادين سهاج
قيس ونا قيس وبا أعرف خراجي=والقول ما يثبت بلا فعل وإنتاج
ياللي سقيت الضمي ملح أجاجي=أبشرك دلوه ورد عد هداج
ويالله عسى للجرح مرهم علاجي=والقلب يبراء ما يجي فيه خراج
ويالله يا ربي ونا لك أناجي=ويالله أنا لك دون الأجناس محتاج
تغفر إلهي زلتي وإنتهاجي=درب الخطا يا رب يا محصي الأفواج
وعلى النبي صليت وأرجي الأفراجي=أعداد عمار بمكه وحجاج

أبو عمر عبدالعزيز بن محمد اليحيان
آل مشرف التميمي
(الشعراء 20/5/1426هـ)

[أبو عمر اليحيان]

بسم الله الرحمن الرحيم
بعد طول إنقطاع غير مقصود أعود لمنتدى السمو والرفعة والإرتقاء منتدى قومي بني تميم العز والجود وأشكر كل قلم صادق أمين يحفظ لهذا المنتدى حقه ويسعى لرقيه ونجاحه أعود بتلك المتواضعة والسالفة العهد وهي تمثل شخصية قائمة في المجتمع وليس من الحكمة توضيح تلك الشخصية ولكن الحكمة قد تكون في :لاغيبة لمجهول.حفظ الله المجتمع من كل علة وآفة

قول من لسان فضاح

الله من قلب له أيام ما أرتاح*يومي وصلفات الهواجس تهزه
وعاف الكرى جفني ولا أرتاح بمراح*وكنه ليا غمض بشوك يغزه
واللي جرى بالصدر من فايح فاح*ونار بضغط الغاز ولع بقزه
هذا بسبب قول من لسان فضاح*قلبه على عوج النصايح يدزه
كنه عجاج مقتفي رايح راح*شره على أعراض الخلايق يفزه
سمه خلط هرجه ولا قام ثم طاح*في مثبره زرعه وشره يجزه
في مجلسه خايب وباير وسداح*وليا هرج تبعه وظله يرزه
بعده علاج ويودع القلب منساح*ويالله عسى لسانه لحد يحزه
ويالله دخيلك من غثا كل نباح*ويالله عسى لسانه لحد يحزه
ولا يدري أن الذيب عدى بلولاح*ولا يشغله كلب بعينه يخزه
ولو كان في وقت غدت فيه الأرباح*يحوشها بزر وديده يمزه
وأسهم وسوق بنوك وصياح ونياح*وقدر يفوح بماه وقدر برزه
وجف القلم والقفل يفتح بمفتاح*والمجلس الطيب رجاله تعزه
تكسب به علوم جزيلات وصحاح*والعود جوف النار طيبه ينزه
وعلى النبي صلوا عدد هب الأرياح*والقلب همه فيه وأصبح يلزه

أبو عمر عبدالعزيز بن محمد اليحيان
آل مشرف التميمي

[أبو عمر اليحيان]

صدق من قال:
وللأوطان في دم كل حر* يد سلفت ودين مستحق
شاء الله أن يرتمي سفيه من سفهاء هذا البلد يدعى سعد الفقيه في أحضان الغرب متنكرا لدينه الذي ينهاه عن خلع البيعة ويتنكر كذالك لولاة أمر وطنه ويسعى والجهل والحمق يدفعه لينال من بلده وما علم أن الجبال الشماء لاتضر إذا قذفت بحجر.
حفظ الله لنا ديننا وولاة أمرنا ووطننا الغالي الثمين ونقول لهذا السفيه ومن على شاكلته بقول الشاعر:
إذا نطق السفيه فلا تجبه * فخير من إجابته السكوت
ونقول له وأعوانه :الوطن ليس للمساومة والكرامة والعزة لاتجنى ثمارها في بلاد الأعداء وصدق الشاعر:
وطني لو شغلت بالخلد عنه * نازعتني إليه في الخلد نفسي
ونقول للسفيه إن ألفت الساكن والسكن فإننا لسنا مثلك بل نردد مع الشاعر قوله:
العين بعد فراقها الوطنا *لاساكنا ألفت ولاسكنا
وأقول:




سفيه تهذي لك بخـرط وتصاريـح=يلفظ بها لسانك وغيـرك شرحهـا
ولا همنا هرجك ولو فيـه تجريـح=والكذب سم المرجلـة مـا ملحهـا
وحتى ولو هرجك اشـارة وتلويـح=بين لنا الصورة ونفسـك فضحهـا
فكرك عفن ما هوب نور وتصحيـح=العاقل اللـي دوم نفسـه نصحهـا
والحر يلجا فـي رفيـع اللحاليـح=لو كان صلفـات الهبايـب لفحهـا
ويكسب بمخلابه جـزال المرابيـح=والطيبـة ليـا نواهـا سدحـهـا
والبوم ينعق بأول الليـل ويصيـح=وكم سرقة بيـن الخرايـب ذبحهـا
وأفهم ترى ما أضمن القول تلميـح=القول واضـح والمعانـي رشحهـا
والحمـد لله دينـنـا بالتسامـيـح=مبـداه وكـرام المعانـي نضحهـا
في ديرة آل سعود ما هزهـا ريـح=ولا همهـا كلـب بنبحـه نبحهـا
وتجـدد البيعـة رجـال مفالـيـح=بيعة شرف ربي عطاهـا ومنحهـا
للـي لهـم عـز وقـدر وترجيـح=حكامنـا وفـق لسـان مدحـهـا
والقول واضح ما يبا القول توضيح=يـا ناسـي داره وحالـي بلحهـا
يا للي نسيت الطلح والرمث والشيح=لاج علـى لنـدن تـدور مرحهـا
يا كلب لندن طوح النبـح تطويـح=بحور النجاسة نجس منهو سبحها
والحمد لله شعبنـا بخيـر ومريـح=يحيا حياة العـز ويقطـف فرحهـا
مكة وطيبة والجبل والصحاصيـح=وساير بلدنـا خيـر ربـي نفحهـا
ومناقشـات السـوء ذم وتشريـح=منها تبرى الشعب واللـي طرحهـا
وبديارنا نسفـه سفيـه المشافيـح=ولا نقبلـه حيثـه سفيـه رمحهـا
وسمع وطاعة للـولاة ومناصيـح=وعقولنا ما حدن بفكـره مسحهـا
وعلى النبي عد السحاب المراويـح=صلوا ولأهل السوء سيف نطحهـا


أبوعمر عبدالعزيز بن محمد اليحيان
آل مشرّف التميمي

[أبو عمر اليحيان]

*(الشبرمي من حقه أنه يمدح )*


الشبرمي من حقه أنه يمدح = يمدح بني عمه وفوق العادة

ماسب ّ احد ,ماقال قول يقدح = وحق القبايل حافظه وزيادة

في شاطي الراحة بصوته يصدح = ولاذم احد لكن فخر بأجداده

(قصقيص)رمزه بالزمان الأفدح = و(مرشد) علم ياللي تريد إفادة

وخليل ماجا لأبن عمه يكدح = الأهل أهله والبلاد بلاده

ويالحاسد اللي في النوادي تردح = الله هو العالم بظنّ عباده

ثمّن كلامك لا تهذر وتسدح = في هروجك اللي ماتضر السادة



أبو عمر
عبدالعزيز بن محمد اليحيان
آل مشرّف التميمي

[أبو عمر اليحيان]

بسم الله الرحمن الرحيم

((يا عميلي راعي الفكر الصحيح!!!))


مظاهر يندى لها الجبين نشاهد طرفا منها في الأسواق والشوارع والمنتديات العامة من بعض الشباب الذين تردّى خلق بعضهم وانتكست شخصيته فرغب بعضهم بجنس غير جنسه وهيئة غير هيئته فأطال ظفائر شعره وتشبه بأخته وتنكر لقيمه وأخلاقه وما علم أن هذا من دلائل نقص دينه وعقله.
أعرض هذا بعد ما شاهدت من تلك المشاهد المتردية والهزيلة وهو رأي شخصي بحت فإن كان قولي من الصواب بموضع فا لحمد لله وأسأل الله أن يسهم بصلاح المجتمع وعلاج علله وأسقامه وإن جانب الرأي الذي دونته الصواب فأستغفر الله ثم منكم أعتذر .
رواد منتدانا السامي بتوفيق الله بسموكم وطيب خلقكم أستأذنكم وأقول:



ياعميلي راعي الفكر الصحيح = إن نشدتك دلني درب السماح
ويابحور الشعر بالنادي الفسيح = لايصير القاف مكسور الجناح
والهواجس تصطفق عج وريح = والسحايب رايجه والبرق لاح
ونعبد الله ماسجدنا للمسيح = مير صار الأمر موضات انفتاح
والصليب يلوح ويزار الضريح= وصرفوا للفكر مشروب الكحاح
وألسن الناس ألتوت عقب الفصيح = والعجم وهروجها أمر مباح
وشفت لي صورة رجل ماهو صريح= جنس ناعم والتأنث له وشاح
قلت غطّ الوجه حيث انه مليح= قال أنا رجّال قلت الطيب راح
قلت من جنسك عسانا نستريح= ماخبرنا إبليس يدعي للفلاح
التغنج للنساء وأنته قبيح= فاسد ريحك مع الأسواق فاح
ولا تحسب النيل في نجد يسيح= والفرات العذب ماساح بنساح
وأعلم أن ماء دارنا لو هو شحيح= عندنا صافي ومشروبه قراح
والأفاعي تقتلب ولها فحيح = والكلاب تحوفنا نسمع نباح
والخلا لطامع ووده يستبيح= ووالله إن دواه ضرب بالسلاح
ومجتمعنا في الخنادق مايطيح= ومجتمعنا يسلك دروب النجاح
ومن بغا للحق ما ياطا السريح= ومن بغا للشر والله ما استراح
ويقلع الله كل خوان ويزيح= ويحفظ الله دارنا ليل وصباح
ولانبي عضو الوطن عضو كسيح= والوطن داره مدوّرة الصلاح
وتجبر المكسور وتداوي الجريح= والوطن شرعي ماهوب أصله سفاح
ونعلم أن التين ماطعّم بشيح= ولانقول أن الزنا مثل النكاح
وآخر القيفان واجب نستميح= العذر من طالب بيوت صحاح
وقافنا دون الأمل والله يبيح = من خلط كاس قراح مع ملاح
والختم صلوا على نسل الذبيح= النبي إعداد ما ثارت رياح


أبو عمر
عبدالعزيز بن محمد اليحيان
آل مشرّف التميمي
(8/4/1429هـ الموافق14/4/2008م)

[أبو عمر اليحيان]

اليوم الوطني واليوم الّلاوطني!!!


قد يكون هذا العنوان (والذي اخترته)غير لائق وغير مستساغ ولكن ليس في الإمكان غير ما كان ولعل لي عذر يقبل عند كل مواطن أصيل وصاحب مبدأ سليم وقويم وأحسب كل مشاهد كذلك.
اليوم هو اليوم الوطني للشرفاء والنبلاء والذين يعرفون كيف تكون خدمة الوطن والمجتمع وكيف يكون التعبير عن تلك الفرحة والسرور.
واليوم هو (اليوم الّلاوطني) لحثالة من المجتمع لا تمثل حسن المجتمع وجماله بأي حال من الأحوال لضآلة أخلاقهم وبؤس شخصياتهم وانحطاطها .
لعل ما يبعث الأمل في النفوس أن هناك الكثير من المواطنين الكرماء يمقتون تصرفات تلك الفئات الشاذة والغريبة على مجتمعنا المسلم العربي الأصيل.
لكن من المؤسف أن يومهم (الّلاوطني) قد صادف هذا العام أحد أيام العشر الأواخر من رمضان المبارك فتضاعف الألم ونزف الجرح دما إثر دم.



عيد الوطن نسمع إزعاج السمرمد = مع الشوارع بالبواري تطاطي
والدم بعروقي وجسمي تجمد = يوم العلم شفته على الأرض ماطي
لفظ الجلالة يرتفع مايخمد = لفظ الجلالة ما يرزّ اعتباطي
واليوم دخان المواتر يعمد = وحذف السجاير عقبها والقواطي
وعسى جخاخ(ن) حبلها صار ييمد = يسطي عليها من الغرابيل ساطي
ويالمزعج اللي في إزعاجه تعمد = لاتحسب أنك صاعد(ن) وأنت واطي
حطبك شبيته من أمس(ن) ورمد = والعز فارقته وفيك إنحطاطي
والكرش ملبود(ن) دجاج مجمد = ومع اللبن والرز وضع إختلاطي
ثم صرت مع جنسك عميد(ن) معمد = والشكل ثور(ن) منطلق من رباطي
أهجد ومثلك واجب أنه يخمد = شجاعتك تعرف بخم السماطي
وعود الأثل ماخبر لو هو يسمد = أثمر بخوخ وتين وإلا طماطي
ولاخبر من تكسر عظامه يكمد = أما أنجبر وإلا غدا به إحباطي
و(يوم الوطن) أفرح عزيز تحمد = من فعلكم يا أهل الهوس والهياطي
وجرح الوطن موجع ولازم يضمد = ولابد بالأبرة يخيّط خياطي
ويسلم شباب(ن) قام عزمه وصمد = وحب الوطن عنده ماهوب إحتياطي
وعسى عيونك يالوطن ماترمد = وعسى يدينك يالوطن بالنشاطي
وسيف الوفا دون الوطن مايغمد = ولاقام عز(ن) للوطن بالخراطي
وشوف الوطن طب(ن) كما الكحل الأثمد = وأرض الوطن شاطي أمان الشواطي
وحب الوطن زرع(ن) ليا ترك همد = نحرص عليه بصيف وإلا شباطي
وراع البحر يفهم وش الجزر والمد = وموج البحر للي جهل فيه غاطي
وصلوا على راع الرسالة محمد = عد الحروف وعد كتب النقاطي


تلك وجهة نظري الخاصة أعرضها في هذا المنتدى إذ للحرية فضاء وأفق ولا عيب أن نتفق أولا نتفق أنما العيب أن ندعي المثالية ونسلّم بوجودها وكأن ليس في المجتمع ما يخالفها ويضادها كما يشاهد في وسائل الإعلام المختلفة .
دلّ الله شباب الأمة لما فيه صلاح أمتهم وحفظهم الله وكافة فئات الشعب من كل سوء ومكروه وحفظ الله لنا ديننا وولاة أمرنا وعلمائنا ووطننا إنه سميع مجيب.

للجميع التحية والتقدير من :
أبي عمر
عبد العزيز بن محمد اليحيان
آل مشرّف التميمي

[أبو عمر اليحيان]

((بسم الله الرحمن الرحيم))

السلام عليكم ورحمة الله وبركاته وبعد:
إنه ليوم فرح وسرور نجتمع فيه اجتماع حب وتلاحم في مدينة من بلادنا الحبيبة المملكة العربية السعودية دولة الرسالة والتوحيد حفظها الله وولاتها وشعبها الأصيل من كل سوء ومكروه,واجتماعنا هذا عظيم المقصد كريم المشهد في بلد الفخر والسؤدد حوطة بني تميم منجبة العظام وحاضنة الكرام وقاهرة المعتدين اللئام فلي ولكم أبارك هذا الجمع الكريم والمنهج القويم والسليم.


الحمد للي جمعنا اليوم بالحوطه = ونا من العام مشتاق ومتباطي
ودعوة بني عمنا وصلت ومضبوطه = ومقدّره والجواب حروف ونقاطي
والنفس مما تشوف اليوم مبسوطه = والعز لأهل الوفا والذل للواطي
حوطة تميم الفخر بالعز مخطوطه = وتاريخ واضح ولا به زيف وأغلاطي
وأرقاب الأتراك مشلوعة وممعوطه = ودون المحارم تميم الفخر تحتاطي
ووقفت أسجل تحية حب مخلوطه = بالطيب للي حضر بأشكال ونماطي
ولآل السعيّد تحية حب مسفوطه = وأسوقها مالها قيد ولارباطي
(والحر) نسله حرار كمّلت شوطه = وفخر تميم بليث صامل ساطي
وعاشت تميم العرب بالعز مغبوطه = تاج العرب فخرها من عصر الأنباطي
تارد عدود الفخر ماجت لناقوطه = قول مثبت ماهوب هروج وهياطي
هامة مضر العرب بالعز شمحوطه = وبحر عظيم بعيد القاع والشاطي
وأعضاء المشرّف بأصل الطيب مربوطه = وأصل على ساس مابه حلف وأخلاطي
وأقول هذا وفكري ما ضرب شوطه = ولالي على أحد من الأجواد مخباطي
وكل القبايل لها التقدير وشروطه = ونشهد لهم بالفخر وافين الأشواطي
في دولة في سجل العز محطوطه = محكّمين الشرع بالعدل ونشاطي
وشبه الجزيره عقب ماهيب مفروطه = اليوم درّه ورفي الشق بخياطي
والمملكه بالحسن والزين ممشوطه = وللحق نسمع ولا نسمع لخرّاطي
ولا نسمع اللي يسوق هروج ممغوطه = الضايع الفكر بين بساط وسماطي
وطبل العدا لو يذيع أفكار مغلوطه = ويظن فكر المواطن خيط مغاطي
الفكر محفوظ ما يقواه ويموطه = والفكر ما يخلفه حجام ساباطي
وحنا على بيعة بالروح مربوطه = بيعة وفا ساميه عن كل وطواطي
لآل السعود السعد مبداه وقلوطه = سور الوطن دون خوان ونطاطي
ويحفظهم الرب ويجنبهم سخوطه = وأسد الشرى للوطن حفاظ ضباطي
وإعداد مزن ينوض البرق بوسوطه = صلوا على اللي لدين الشرك غطاطي

أبو عمر
عبد العزيز بن محمد اليحيان
آل مشرّف التميمي

(حفل آل مشرّف بحوطة بني تميم)
الخميس 15/11/1429هـ الموافق 13/11/2008م

[أبو عمر اليحيان]

بسم الله الرحمن الر حيم

(أهلا وسهلا يـ (العتيبي )وللقاف *تأثير يا مقدّر رفيقه وجاره)

يقول شاعرنا الكبير( شاعر تميم) عبدالله بن علي بن صقيه التميمي بحق الشاعر الكبير( شاعر هوازن) عبد الرحمن العطاوي العتيبي وقبيلته:

أهل دروع وشلف وتروس وطياس = وخيل عليها يزعجون الحداوي

شاهدت ما كتب الأخ الحبيب الشاعر (الصريح) العتيبي ونعم الأصل أصله ونعم الأرومة أرومته وليس بغريب من شامخ مثله هذا القول بمنتدانا السامي بالله ثم به وأمثاله أصحاب العقول النيّرة والمتجردة من الأفكار البائدة والمتحيّرة ولقد قال في صفحتي ذات العنوان :تميم يا عز العرب وارتكازه ,هذا البيت وذلك من عظم خلقه ونبله:

تميم عادات وتقاليد واعراف=ومجداّ بني ساسه وثبت اجداره


أشكره وأحفظ له جميل قوله وأستأذنه وأستأذنكم بالقول:



أستأذن عيال العمومة والإشراف = بأبيات دون المستوى والجداره
لكنها من خاطر(ن) طيّب صاف =وعيارها ما عروجته الخساره
بحق من عدّ الحقايق ولازاف = بحق (الصريح )اللي صريح العباره
والطيب بحروف الأجاويد ينشاف = ويجلى ظلام الليل صادق نهاره
وأهلا وسهلا يـ (العتيبي )وللقاف = تأثير يا مقدّر رفيقه وجاره
و(عتيبة الهيلا) على الطيب وقّاف = تاريخ ما حرّف وزوّر مساره
أهل الكرم وأهل الشجاعة والإنصاف = ورجال لا ثار بنهار(ن) غباره
وقول الحقيقه ما به نقاش وخلاف = ونفهم من الغالي رموز الإشاره
وأهلا هلا آلاف, وآلاف ,وآلاف =بك يـ (الصريح) اللي تمثل سفاره
ونعم السفير اللي من الطيب صرّاف = وبالمنتدى قافه عزيز (ن)مداره
وعدى (العتيبي) بالوفا راس مشراف = وحنا نرحب به ويحسب بداره
وقال التميمي حق ماقال بجحاف = :المنتدى ناديك وأبرك زياره

إنه لمنهج الكرماء ومسلك العظماء من يشيع المودة والمحبة بين القبائل العربية الأصيلة فيكون سفير حق وناطق صدق ويذكر المناقب ويغض الطرف عن المثالب في المجالس والمنتديات, فبارك الله من هذا منهجه ومسلكه ووفقه الله لكل فلاح ونجاح.
مثل هذا الموقف الآسر بجماله والدّال على كرم صاحبه وطيب خصاله كان لي موقف مماثل له مع فرد كريم من تلك القبيلة الأصيلة فكانت تلك الرسالة:

الأخ الفاضل الكريم /حامد البراق حفظك الله
السلام عليكم ورحمة الله وبركاته وبعد:
يقول الشاعر /فهيد المجماج التميمي بحرقة وألم ليلة رحيل جيرانه الهياضلة من الملابسة من الدعاجين من عتيبة الوفاء والمروءة والكرم:



أوي جيران على الكبد حلوين=مثل الحليب اللي لذيذ شرابه
لا والله إلا جو وراحوا على زين =ولاعذبوا جيرانهم بالطلابة

وما قال شاعرنا غير شهادة حق تظل باقية ومتوهجة وتعكس الصورة الحقيقية لقبيلة عتيبة قبيلة الفخر والسؤدد ,تلك القبيلة التي عانقت شمّ الجبال بتاريخها ذي المجد والعز الباذخ وحاضرها الجميل والمشرف.
أخي الكريم صاحب الأرومة الزكية إن الصورة التي وضحها شاعرنا غفر الله له بعد صحبته الطيبة مع جيرانه لها ما يماثلها في عصرنا الحاضر وإن كان التوضيح الحاضر لا يصل للدرجات العلى وتلك صورة بعد موقف عظيم رسمتها بعد موقف مشرف من زميل لي بالعمل ينتمي لتلك القبيلة العظيمة:

العتيبي مع خويه ماتردى =سلم لأجداده وهو للطيب وارث
ومن يعد الحق والله لو تمدى=ماهرج باطل ولاجاب الكوارث
والتميمي ماجحد طيب وتعدى=وقال حق ولاسعى بالشر حارث

أخي الفاضل إن ما كتبت أنت في صحيفة الجزيرة بواسطة قلمك الرائد في عدد سابق سيظل عندي مخلد في الذاكرة ما حييت حيث لمحت فيه الاستقامة في القول وحفظ الحق في وقت أختلط حابله بنابله وخاثره بزباده وجاء للهوى في الرأي فعل وأثر .
أخي الكريم تلك أبيات إخوانية متواضعة ولست ممن يحسن صنعة الشعر لأتقنها وإنني منك أعتذر بعدم الوفاء بحقك وحق قبيلتك الكريمة الوفية:


ياحامد البراق نوّرت الأوراق=وعدّيت لك حق(ن) بكلمه يسيره
والطيب بيّن واضح(ن) مثل الأشراق = وسلومكم ماهي عليكم عسيره
ولك التحيه عدّ مالاح برّاق=ونعم(ن) بأهل جود طبايع وسيره
ولا ناب لا شاعر ولا نيب ورّاق =و نفسي على عدّ الحقايق جسيره
والله يحفظك يابن زاكين الأعراق = والحر ماورّث حرار حسيره
وأقبل تحيات(ن) بها الودّ غرّاق=ياللي غدت نفسه لجوده أسيره
والطيب جمّاع(ن) ولاهوب فرّاق=ودرب الوفاء كل القبايل تسيره
ومن يحفظ حقوق العرب نايف (ن)راق=ومن هانها يصبح ونفسه خسيره
والعود الأزرق بعد بايع وحرّاق = لك والذي مثلك يشرّف مسيره
وعبر البريد الود يرسل ورقراق=ومحبة(ن) جزله ولاهي كسيره
أخي الفاضل يطيب نشر الصحافة بمثل ما تكتب ويزدان بعرض الرأي المجرد من الأهواء والحافظ لحقوق الأفراد والقبائل وبورك بقلم يحسن هذا ويتقنه.
0000000000000000000000
أتمنى أن تزدان المنتديات بمثل تلك الأقلام الرشيدة والممثلة للعقول الناضجة لتثمر المجالس ويطيب القطاف ويزداد التلاحم بين قبائل وأفراد المجتمع.

للجميع الحب والتقدير والاحترام من أخيهم ومحبهم:

أبو عمر
عبد العزيز بن محمد اليحيان
آل مشرّف التميمي

[أبو عمر اليحيان]

بسم الله الرحمن الرحيم





كانت البارحة ليلة جميلة من الليالي الجميلة لقبيلة بني تميم ولقد تشرفت أسرتنا أسرة اليحيان المشارفة باستقبال وفود من الأسر التميمية العظيمة في المحافظة وخارج المحافظة وكان الفرح ماثلاً والأنس بادياً فسعدنا غاية السعادة بهذا الحضور وهذا التشريف فلكل من حضر الشكر والتقدير ولكل من أعتذر (وما رغبنا باعتذاره)الحب والوفاء وليته شاطرنا تلك الفرحة .


بلساني ونيابة عني وعن والدي و أعمامي وإخواني وأبناء عمي وكافة أسرة اليحيان والذين أنسهم أشد من أنسي وفرحهم أشد من فرحي بتلك المناسبة الكريمة أسجل تلك الحروف و هي دون الأمل ولا تبلغ ما تمنى النفس أن يبوح به اللسان ولكن لعل المقصّر يعذر وقد دون ما بوسعه ليعرضه على كرام عظام ثقته بهم لا حدود لها ولانهاية.




مرحبا بالضيوف في الشعراء = وبكم طاب مجلس السعداء
طبت ثهلان بالكرام وطابت = أرضك اليوم في رجال الوفاء
في تميم الوفاء وأهل المعالي = أهل فضل سما إلى العلياء
اجتماع مبارك وجميل = رمز حب لقومنا العظماء
يا تميم لك المفاخر دوما = فأرتقي اليوم في عنان السماء
يا تميم بشرع ربك كوني = ركن عز بدولة الحكماء
نحن قوم إذا دخلنا بعهد = لا نخنه بليلة ظلماء
ولنا بيعة وعهد سيبقى = ماحيينا كصفحة بيضاء
بارك الله في الحضور وأهلا = وارتقينا للقمة الشماء
يا تميم لقد تضآل قولي = فاعذريني وخففي من عنائي
أنت بحر ولا يجوز لمثلي = وصف بحر بمنطق البلغاء
لكن الشوق في فؤادي ينمو = مثل زرع معاهد بالماء
دمت للعز موئلا وشعاعا = دمت للعلم مصدر للنماء
رحل الشيخ لكن العلم باق = ببنيه الأكارم النجباء
والرجال الكرام من أصل خير = وشحونا ببردة الفضلاء
وختام المقال أهلا وسهلا = لحن حب بأحرفي وثنائي
يا كرام حللتم عند أهل = فأرى الحسن في مجالس الشرفاء








أبو عمر


عبدالعزيز بن محمد اليحيان


آل مشرّف التميمي


(الخميس 25/6/1430هـ - قصر اليحيان ببلدة الشعراء)

[أبو عمر اليحيان]

بسم الله الرحمن الرحيم





((وهم نقلوا عني الذي لم أفه به 000 وما آفة الأخبار إلا رواتها))


الغيبة والنميمة من الأمراض الفتاكة بالمجتمع وهي ضارة به أيما ضرر وموهنة ومنهكة لقواه ونشاطه ولقد جاء التحذير منها في القرآن والسنة وما حذر الله ورسوله من أمر إلا وفي تركه الصلاح والفلاح للمجتمع.
شاء الله سبحانه وقدّر لي بمقابلة شخص في مرفق من مرافق الحياة وليس لي به سابق معرفة من قبل ودار بيني وبينه نقاش وكان في محفل واجتماع عام وكان النقاش في أمور تتعلق بالعمل ومشاكله وظننت من قوله وحديثه أن به من الخير ما يحسن وجوده بمثله ولا أزكي نفسي ولا أزكيه على الله والله هو الرقيب وهو الحسيب ,وبعد فترة من الزمن وليست بالطويلة أقابل شخص آخر ولي به زمالة عمل من فترة طويلة ولا يزال لها بقية باقية أقابله وأجده يقول لي:إن فلان ذكر لي أنك ذكرتني في اجتماع عام بسوء وذكرت بي صفة لؤم فقلت له:سبحان الله!!!أقال هذا؟! قال:نعم.قلت:لعله قال: إن زيدا من الناس أخبره وهو ناقل لحديثه ,قال :لا, وإنما قوله هذا نقلا عنك أنت وليس غيرك ,فقلت له: إن صدقت القول في نقل ما سمعت عنه فأنت بإذن الله برئ والوزر عليه إذ نقل ما لم أقله بلساني وأنا بحول الله برئ مثلك ولم أخض في قول ضدك فليس من الدين والحكمة وليس من الخلق والأدب أن أتفوه بقول مثل هذا وذلك لأسباب تحول بيني وبين هذا المنهج السقيم أولها ديني وثانيها خلقي الذي يمنعني من هذا المنهج السقيم.
افترقنا وفي النفس ألم وداء ,افترقنا وفي الحلق غصة ,افترقنا وأنا في حيرة من الأمر,افترقنا فكان القريض أنيسي وعلاج دائي فقلت وفي القلب حرقة:





((اليوم هرج نسمعه وش دليله؟!))




سمعت هرج وأمرح القلب مشلوط 000 تدفق شرايينه ولجّ بغليله

ومما سمعت أصبح على الصدر ناقوط000 ناقوط سمّ وأرجي الله يزيله
وذا لي ثلاث أيام ما نيب مبسوط000(من قول:قال) وبالردى والفشيله
وهرج القفا مالي به سلوم وشروط000 ولاناب من يلدغ وينهش زميله
وبيني وبين الصاحب حدود وخطوط000 ولا رسّمت عندي بكذب وحيله
وإن كان(000000)هرج هرج مضبوط000 حق(00000) فوق راسي وأشيله
وإن كان(000000) هرج هرج مخلوط000 يثبت كلام قال بأيّة وسيله
ويحط (000000)على حروفه نقوط000 ويجرد حساباته ويجرد حصيله
وكان(0000000) ناقل نقل مغلوط000 ما ناب من يركض ويومي شليله
وأنا ما ناب أضرب على صاحبي شوط000 وأنا ما ناب اللي ينمّ بخليله
ولا أسعى لي بقول مرهّم و ممغوط000 ولا أزود في صاع الأذى كم كيله
والفجر له خيط يميّز عن خيوط000 والنفس ما ترضى الحياة الذليله
وهذا القلم يكتب موجه ومضغوط000 ويترجم الواقع نهاره وليله
وآرد على عد ولا لي بحابوط000 ومن فضل ربي وأطلبه وألتجي له
وفكري سليم وبعض الأفكار مخروط000 أهل العقول الخايبه والهبيله
وهذا الكلام وزبدته رأي مسفوط 000 ولا يسبق إلا اللي بخص فعل خيله
وراسي يا(000000) من الشيب مشموط000 واليوم هرج نسمعه وش دليله؟!
وأنا أتبرا كانها هروج خربوط000 وسط المجالس بان حذفه وميله
ويا مطلق لسانه عقب كان مربوط 000 عوّد وشدّه ثم تيّل بتيله
والعقل ما يركب على لسان مفروط000 ولا عاقل بالقيظ يفرى صميله
وراع الوفا حقه على الراس محطوط000 ونعرف مدى طيبه وحقه مثيله
واللي علينا يرسل الهرج ممشوط000 بالكذب ما نقبل تهاويل قيله
وهذا الزمان اللي به الحق مزروط000 وبالمختبر خلطت كشوف الفصيله
وأختم كلامي لايجي رفع وهبوط000 ولاناب طرّاد الهروج الهزيله
اللي تموط العقل من داخله موط 000 موط الدليّ من جمّ بير طويله





أبو عمر


عبد العزيز بن محمد اليحيان


آل مشرّف التميمي


*( اضطررت لعدم التصريح بالأسماء ولعل هذا التصرف هو الصواب وأعتذر إن لوحظ اضطراب في بناء القصيدة لهذا الإجراء)

[أبو عمر اليحيان]

بسم الله الرحمن الرحيم

يا أحفاد الأحنف يا أهل الرأي والحكمة والمشورة



تميم يا اهل الحلم والعلم والنور=أشوف نادينا تصافق عجاجه


يا حفاد الأحنف يا هل الراي والشور=يا احرار ما تقبل طيور السماجة

خبري بناديكم على الطيب معمور=ولا فاز من يسعى بمسعى حراجه

وعنوانه أهلا مع تراحيب وسرور=ولا مرحبا با اهل الردى واللجاجة

ومن جا يبي حق عزيز ومنصور=ومن جا يبي شر علينا علاجه

وحق القبايل ما صرفناه بالزور=والعاقل اللي فاهم وش خراجه

وإن جا سفيه ضارب العقل معثور=نسفه ولا نسمع صياح الدجاجة

و(يام) و (تميم) للوطن سور مخبور=ووردوا قراح عدودها مع هماجه

وبظل الشريعة صاحب الشر معثور=ولا لبس ثوب العز ولا حاز تاجه

والله يحفظ بلادنا من هل الجور=اللي تدور عقولها بالرجاجة

وتبقى تميم أسم عظيم ومشهور=وقول بلا برهان ما جاب حاجة

لتكن الحكمة والروية والأناة وإنزال الناس منازلهم وحفظ حقوق القبائل هي مقومات شعار هذا المنتدى الجميل و ليظل هذا المنتدى كوكباً سامياً في سماء المنتديات الراقية وليكن خير صورة لقبيلتنا العظيمة زادها الله شرفاً على شرف.

أخوكم ومحبكم/
أبو عمر
عبد العزيز بن محمد اليحيان
آلـ مشرّف التميمي

[أبو عمر اليحيان]

بسم الله الرحمن الرحيم
تلك حروف على عجل إثر رسالة أثيرة وجميلة وذات مشاعر فياضة من أخ كريم فاضل في هذا المنتدى وقد كساني الفاضل من عظم كرمه بحلة لست لها بمستحق والجواد والكريم مثله يعذر ويشكر فله ولكم الحب والتقدير وإليكم تلك الحروف المعتلة فاعذروا صاحبها وتجاوزوا عن كل خلل يعن فيها ويتضح .

غنيت يا ساري على كل فنّي *** وتعب القدم من راس صوح لصوح

واليوم يالغالي أفكر بسنّي *** راحت ليالينا وطرد المزوح

واليوم سوق الشعر جا به تدنّي *** وطوي الرشا والله يداوي الجروح

وتعبت مفاصلنا ولابه تثنّي ***والباقي اعذر مالنا بالشروحي

والشعر صفحة ماضية راح عنّي *** وعلى الفضا ياكثر ما أشوف وأوحي

وغنا الشعر إنسي وغناه جنّي *** ونزل بحوش البيت وفوق السطوح

وعفناه من جنس تصيح وتونّي *** يقول أنا بالحب ياويل روحي

يشبع من الكبسة ويصبح يغنّي *** يقول قلبي بالمشاعر سبوح

ويقول : أنا بالشعر فارس وإنّي *** الشاعر الوهاج وأفطن لضوحي

وليته ترك درب دليله تمنّي *** وليته هجد ماسهر ليله ينوح

وجهة نظر لعلها تقبل ولساري 1 ولكم التحية من أخيكم ومحبكم:
أبو عمر
عبد العزيز بن محمد اليحيان
آلـ مشرّف التميمي