المكشات ( دعوة للمناقشة ) ...

[تركي]

بسم الله

أهلين يا إخوان


الشتاء جاي ويبي يزين البر ، والمكشات منتدى جديد وودنا يكون مرتب ترتيب حلو وسهل ووافي ايضا ...


مانبي شيء ناقص بالعربي ...


اللي نبيه هو تغطية كافة جوانب المكشات وأنا عندي مواضيع ودي تشوفونها وتعطوني رأيكم فيها وهي تعتبر خطوط كبيرة لمنتدى المشكات او اقسام المشكات من خلال طرح المواضيع :ـ

1ـ التجهيزات والعدد والعزب عموم من خيم ومواطير وووووو إلخ ...

2ـ السيارات وانواعها وعددها وشغلها من إلى ...

3ـ السلاح والبنادق وانواع الفشق ..

4ـ الصقور وتدريبهن وما يتعلق بهن من كل شيء وهذي اهل قطر ماشاء الله بيكفون ويوفون ...

5ـ سلق الصيد أجلكم الله وتدريبهم وانواعها وما إلى ذلك ( لا تستغربون كلن له هواية ) ...

6ـ أجهزة الملاحة مثل القارمن وانواعه واسعاره وما إلى ذلك ...

7ـ الكاميرات والإجهزة المصاحبة للكشات كالكناوود والقلوب ستار والدرابيل ويالله من هالأمور الطويلة العريضة ...

8ـ صور للحياة الفطرية بأنواعها واشكالها وصور للطيور المهاجرة والحيوانات المراد القضاء عليها ...

9ـ والله حنا حبايبنا اهل قطر والساحل الشرقي وهم يحبون صيد السمك والروبيان مافيه مانع يضيفون لنا هواية جديدة ترا نتعلم صيد بحر ونسوي قراصنة ...

10ـ المواسم واقصد بها مواسم كل شيء كل شيء ...

11ـ الصحة وماأدراك مالصحة وتبيين ماهو ضار وماهو نافع ...

12ـ الإحداثيات للمعالم المراد الكشته لها ويستحن يكون ملف مرتب ترتيب حلو ومنضبط يسهل الوصول إليه ...




لو كان فيه احد يشوف ان الترتيب يحتاج تعديل او إضافة او إختزال فياليت يشاركنا لتلاقح الأفكار وتطورها بما يخدم المكشات ...


تحياتي للقنوص ...

[رساوي تميمي]

هلا ومرحبا تركي
كلش زين بس ناقصنا مكتبه احداثيان
وهي ان شالله هذاني اجمعها واذا خلصت منها ابشروبها

[راع الاوله]

لا هنت يابو عبدالعزيز

ترتيب ولا اروع


ومن ناحيتى انا عطني باغطي لك المناطق الشرقيه من السفانيه .. نزولا على صمان لين تاصل نفود الرمحيه فى اشيقر ...


بس قبل كل شى عندك المواسم ... بنبدا بالوسم عقبه المربعانيه وهي ثلاث نجوم كل نجم 13 يوم عقبهم العقارب وهي نفس الشى ... عقبهم النعائم .. (( هي تحيا فيها الفياض والريضان ))

فراح تكون التغطيه مختلفه

الوسم يكون فترة امطار نسال الله ان يرزقنا ويغيثنا ...
وافضل المناطق متابعه هي الشعب و الدحل والجو ....

انا مستعد اجيب لكم صور بعض الدحول القريب وبعض الشعبان ...

وياليت يكون هناك تنسيق على افضل المناطق جاها غيث ومطر ..

تعرف من سنه لسنه يختلف الربيع من منطقه لمنطقه ..

********

ومن ناحية اجهزة الملاحه :) ابشر بعزك اول باول راح تجيك المعدات

ونبي لنا شقردي شرواك يزودنا باخر صيحات العزب :)

والطيور عطها راعيها ابو خلود (( تميم قطر)) تراه واعدني بشيهانه ..

وكل واحد عنده علم جديد لا يبخل علينا

لا هنت يابو عبدالعزيز

ولى عوده

[تركي]

أما العزب فناموا عنها


عندنا عزبة من أزمة الخليج والحمد لله للحين نكشت بها ...


مافيه اهل عزب اهل عزب

ماتموت من الجوع لا كشتنا معك...


لكن مدار العزبة يا أخوان الكاتم


عموما ابشروا باللي يسركم لكن خلو الشغل مرتب ...



تحياتي للقنوص ..

[راع الاوله]

طيب نبي لنا موجه موحده


وتكون لاهل المنتدى ....


انا دايم متواجد على ذى الموجه

150150

[تميم قطر]

ابشر ياتركي .. ادوات المقناص .. وانواع الطيور ............. وكيفية التدريب ....


ان شاء الله سأقدمها بشكل سهل ومفهوم........

[راع الاوله]

مثلك شايفين يا الاخوان


جو زين هاليومين ... وهذا تو الوسم مادخل


وان شاء الله ف6ى تاريخ 12 او 13 رمضان ... بيكون اول ايام الوسم


وهو ثلاث نجوم ... وكل نجم 13 يوم تقريبا والمجموع ايام الوسم 51 يوم


وهي عاده تكون ايام مطر وخير


نسال الله ان يرزقنا ويغيثنا ...

فالطلعات قربت ... واللى عنده مواقع واحداثيات لشعبان تفيض وقت الوسم لا يبخل علينا

[ابن عقيِّل]

موضوع رائع ويعطيك العافية اخوي تركي

وبالنسبة للصمان والدهنا امرها سهل عندي ان شاء الله

وانا أؤيد اللي قاله أخوي راعي الأوله انه يكون موجه ثابته بالكنوود ومادام 150150 بعيده شوي عن الزحمه احس انها ممتازة وهي فكره زينة علشان الواحد يسمع صوتكم مهب بس نقرا كتاباتكم

ويعطيكم العافية

نواف ابن عقيِّل المشرفي الوهبي التميمي